Kryetari i Kuvendit Niko Peleshi është paditur të hënën në Prokurorinë e Posaçme, SPAK, nga Grupi Parlamentar i Partisë Demokratike, se në kundërshtim me ligjet dhe Rregulloren e Kuvendit ka refuzuar të mbledhë Këshillin e Mandateve, një organ i Kuvendit që shqyrton kërkesën e kësaj prokurorie për arrestimin e zv.kryeministres Balluku.
“Në mënyrë arbitrare, pa një vendimmarrje të Këshillit, kryetari i Kuvendit ka ndërprerë mbledhjen, pa caktuar mbledhjen e ardhshme, me arsyetimin sipas tij për t’iu dhënë kohë anëtarëve dhe palëve të njihen me dokumentet shoqëruese të kërkesës së Prokurorisë”- thuhet në padinë e dorëzuar nga grupi demokrat.
Kërkesa e Prokurorisë së Posaçme ku kërkohej leja e Kuvendit për për dhënien e autorizimit nga Kuvendi për arrestimin/heqjen e lirisë së deputetes, zv.kryeministres dhe ministres së Infrastrukturës dhe Energjisë u depozitua në Kuvend në datën 16 dhjetor.
Peleshi thirri Këshillin në mbledhje për të shqyrtuar çështjen tri ditë më pas, por mbledhja u ndërpre pa arritur një konsensus mes anëtarëve për caktimin e datës së mbledhjes së ardhshme, ku duhej të merrej dhe vendimi për imunitetin e Ballukut.
Duke qenë se Këshilli ka një përbërje të barabartë mes anëtarëve të mazhorancës dhe opozitës ky organ, sipas dispozitave në Rregulloren e Kuvendit, mund të mblidhet me kërkesë të 5 anëtarëve të tij, por Peleshi refuzoi në mënyrë të përsëritur të thirrte mbledhjen edhe pse 5 anëtarët e PD-së e kërkuan këtë gjë të paktën 5 herë që nga data 19 dhjetor.
“Në përmbajtje të këtyre kërkesave, deputetët kanë arsyetuar se pasur parasysh precedentët e mëparshëm, koha ka qenë mëse e mjaftueshme për t’u njohur me aktet dhe përgatitur mbrojtjen, si dhe duke mbajtur në konsideratë qëndrimin e Prokurorisë të shprehur me shkrim dhe me gojë gjatë mbledhjes së parë lidhur me natyrën e ngutshme të kësaj kërkese dhe prishjen e provave (intimidimin e dëshmitarëve) nga e pandehura Belinda Balluku, është e nevojshme që Këshilli të mblidhet sa më shpejt për vijimin e shqyrtimit të kërkesës, me qëllim që të mos bëhet pengesë për mbarëvajtjen e hetimeve”- argumenton PD në një njoftim për mediat të hënën.
Demokratët pretendojnë në padinë e tyre se Peleshi i ka refuzuar kërkesat “në mënyrë tërësisht arbitrare dhe të paligjshme, duke cënuar njëkohësisht të drejtën e ligjshme të deputetëve për të thirrur mbledhjen e Këshillit, dhe si rezultat i zvarritjeve të pajustifikuara edhe mbarëvajtjen e hetimeve të Prokurorisë së Posaçme”.
Sipas demokratëve Kryetari i Kuvendit ka konsumuar katër elementët e anës objektive të veprës penale të “Shpërdorimit të detyrës”, mosveprimin, duke refuzuar mbledhjen e Këshillit dhe njoftimin e rendit të ditës, shkeljen e ligjit, shfrytëzimin e funksionit politik për të dëmtuar të drejtën e deputetëve për mbledhjen e Këshillit dhe mbarëvajtjen e hetimeve penale.
Justifikimi zyrtar I Peleshit për mosthirrjen e mbledhjes ka qenë “procedural” për t’u dhënë, sipas tij, afat kohor palës së paditur dhe anëtarëve të Këshillit për t’u njohur me provat dhe aktet e dorëzuara nga prokuroria.
Por, duket se justifikimi nuk qëndron pasi as avokati I Ballukut dhe as anëtarët socialistë të Këshillit nuk e kanë tërhequr dosjen në formatin USB me 16 mijë faqe prova dhe akte që SPAK ka dorëzuar në Kuvend.
Dhënia e autorizimit për caktimin e një mase sigurie ndaj deputetit parashikohet në nenin 118 të Rregullores së Parlamentit, pa afate të qarta për shqyrtimin paraprak. Sipas këtij neni, kryetari i Kuvendit është i detyruar që t’u kalojë anëtarëve të Këshillit dhe deputetit në fjalë kërkesën e Prokurorisë dhe dokumentet shoqëruese, ndërkohë që i bën të ditur këtij të fundit kohën në të cilën Këshilli për Rregulloren, Mandatet dhe Imunitetin do të fillojë shqyrtimin e kërkesës.
Në përfundim të shqyrtimit, Këshilli brenda 2 javëve harton një raport për në seancë plenare, në të cilin rekomandon rrëzimin ose miratimin e dhënies së autorizimit dhe shqyrtimi i kësaj kërkese vendoset si pikë e parë e rendit të ditës në seancën pasardhëse.
Sipas ekspertëve të ligjit, Kuvendi në rastin e Ballukut po shtyn pa afat shqyrtimin e kërkesës së Prokurorisë së Posaçme, çka sipas tyre bie në kundërshtim me frymën e dispozitave ligjore dhe vendos një precedent të rrezikshëm të qëndrimit të Kuvendit.
