Të mërkurën paradite një grup aktivistësh të shoqërisë civile protestuan përballë Kryesisë së Kuvendit duke kërkuar heqjen e mandatit të deputetes dhe dorëzimin e zv/kryeministres Balluku përpara drejtësisë.
Mbledhja e Këshillit të Mandateve dhe Imuniteteve që ishte parashikuar të kryhej më 28 Janar për imunitetin e zv/kryeministres Belinda Balluku, është shtyrë pa afat.
Aktivistët e quajtën këtë shtyrje si manovër për t’iu shmangur kërkesës së ardhur nga drejtësia dhe pretenduan se Këshilli i Mandateve po përdoret si instrument për të blerë kohë dhe për të shmangur llogaridhënien.
“Këta që janë të veshur me pushtet po përdorin të gjitha mënyrat ligjore dhe ekstraligjiore për të zvarritur këtë proces. Rreziku është se nëse kalon afati prej tre muajsh mund të pushohet çështja”, tha aktivisti Andi Tepelena.
Ai shtoi se ky është një moment tepër delikat jo vetëm për drejtësinë, por edhe për demokracinë shqiptare.
Sidorela Vatnikaj, aktiviste e kauzave civile shtoi se zvarritja e procesit nga Këshilli i Mandateve po përkthehej në një mesazh të qartë që ligji nuk është i barabartë për të gjithë.
“Mandati i Ballukut po përdoret si mburojë përpara drejtësisë”, tha Vatnikaj. “Kjo nuk është një vonesë proceduriale, por një mbrojtje e orkestruar”, shtoi ajo lidhur me shtyrjen e seancës për mandatin e Ballukut.
Edhe Migen Qiraxhi nga Qëndresa Qytetare u shpreh se deputetët janë pikërisht personat e zgjedhur nga populli për të mbrojtur interesat e qytetarëve, por në këtë rast kjo nuk po ndodh.
“Si mundet që deputetët të zgjedhur prej popullit mbrojnë hajdutët dhe vjedhjen, dhe të korruptuarit. Kjo është a papranueshme”, tha Qiraxhi gjatë fjalës së tij.
“E kanë shtyrë mbledhjen pa afat, duket sikur në këtë vend punojnë vetëm hajdutët” përfundoi ai.
Gjatë aksionit simbolik aktivistët hodhën gjithashtu dhjetëra çelësa të cilët simbolizonin apartamentet e zv/kryeministres të përfituara nëpërmjet aferave korruptive.
