Gjykata e Posaçme e Shkallës së Parë për Korrupsionin dhe Krimin e Organizuar, vendosi sërish dënimin e Moisi Habilajt me 15 vjet heqje lirie për trafik narkotikësh dhe grup të strukturuar kriminal, që bazuar në gjykimin e shkurtuar prej nga ulet 1/3-ta, reduktohet në 10 vjet burg. E njëjta masë dënimi u dha ndaj tij edhe në vitin 2021, kur u gjet fajtor së bashku me tre të pandehurit e tjerë, Nezar Seiti, Maridjan Sulaj dhe Fatmir Minaj. Çështja u rikthye për rishqyrtim, por masa e dënimit ndaj Habilajt mbeti e njëjtë, ndërkohë, i pandehuri Nezar Seiti u dënua me 12 vjet burg nga 13 vjet e 6 muaj heqje lirie që u dënua në 2021-in. Në aplikim të gjykimit të shkurtuar, dënimi përfundimtar ndaj Seitit mbetet 8 vjet burg.
Në rigjykimin e çështjes, u pushuan akuzat për dy të pandehurit e tjerë, Maridjan Sulaj dhe Fatmir Minaj, për arsye se ka rezultuar të jenë dënuar me vendim të formës së prerë për të njëjtin fakt penal.
Në janar 2019, Prokuroria e Krimeve të Rënda përfundoi hetimet për Habliajn dhe tre të gjykuarit e tjerë. Ata u akuzuan se në një hark kohor disavjeçar, në bashkëpunim me njëri-tjetrin dhe persona të tjerë kanë trafikuar kanabis drejt Italisë.
Moisi Habilaj, u dënua më parë me 15 vjet heqje lirie në Itali, po për trafik ndërkombëtar narkotikësh. Drejtuesi tjetër i bandës, italiani Antonino Riela u dënua me 14 vjet burg ndërsa Meridian Sulaj mori tetë vjet e katër muaj e Nezar Seitaj u dënua me shtatë vjet e pesë muaj burg.
Organizata e Habilajve bëri bujë në arenën politike shqiptare në tetor 2017, pasi publikimi i dosjes italiane ekspozoi lidhjen e tyre me ish-ministrin e Brendshëm, Saimir Tahiri.
Edhe pse Tahiri u akuzua nga ish-Prokuroria për Krime të Rënda për trafik droge dhe pjesëmarrje në organizatë kriminale, ai u dënua nga gjykata respektive për shpërdorim detyre. Paralelisht me Tahirin u shpall fajtor edhe Jaeld Çela, ish-drejtues i policisë së Vlorës.
