Me shumicën e votave të anëtarëve, Këshilli i Lartë Gjyqësor rrëzoi të premten një kërkesë për verifikimin e statusit të gjyqtares së Gjykatës së Posaçme, Irena Gjoka lidhur me mosdeklarimin prej saj të një dënimi penal të dhënë nga drejtësia greke në vitin 2005.
Çështja e Gjokës u fut në rendin e ditës me propozimin e katër anëtarëve të KLGJ-së dhe kërkesa për fillimin e verifikimit të statusit u parashtrua nga anëtarja Irena Plaku.
Plaku referoi se në raportin e dërguar nga Prokuroria e Përgjithshme konstatohet se Gjoka është dënuar në vitin 2005 nga Gjykata e Janinës me 3 muaj burgim dhe gjobë 1500 euro, ndërsa rezulton të jetë urdhëruar mosekzekutimi i dënimit dhe çështja është arkivuar nga drejtësia greke. Sipas saj, Gjoka nuk është dënuar ndonjëherë me vendim përfundimtar nga autoritetet e drejtësisë shqiptare apo të huaja.
Plaku propozoi më pas që Këshilli të fillojë procedurën e verifikimit të statusit të gjyqtares Irena Gjoka. Pasi propozimi u kalua për votim, anëtari magjistrat, Ridvan Hado deklaroi votën kundër, si dhe parashtroi arsyetimin e tij përse kërkonte rrëzimin e këtij projekt-vendimi.
Hado diskutoi mundësinë e dërgimit të çështjes për verifikim pranë Inspektorit të Lartë të Drejtësisë, ILD, apo nëse do ta mbanin vetë për ta trajtuar. Ai argumentoi se KLGJ ka nuk mund të ketë rol aktiv në këtë rast.
“Çështja duhet të dërgohet në ILD, ashtu siç është proceduar me rastet e tjera kur magjistratët kanë qenë të dënuar. Mendoj se duhet t’ia dërgojmë ILD-së, prandaj jam kundër,” shtoi ai.
Propozimi i Hados u përqafua nga pesë anëtarë të tjerë të KLGJ, përfshirë kryetarin Ilir Rusi, zv.kryetaren Yllka Rupa si dhe anëtarët Markelian Koça, Klodian Kurushi dhe Ermona Muçi.
Katër anëtarët Irena Plaku, Bledar Bajri, Gentiana Muçaj dhe Albenc Tabaku që propozuan projekt-vendimin e të premtes mbetën në pakicë, duke i qëndruar propozimit që verifikimin ta kryejë KLGJ. Anëtarja Violanda Theodhori nuk ishte e pranishme në mbledhje.
Pas rrëzimit të projekt-vendimit, anëtarja Irena Plaku kërkoi sërish fjalën, por kryetari Ilir Rusi tha se mbledhja ishte mbyllur tashmë dhe të gjithë u larguan nga salla e mbledhjes plenare.
I pyetur nga BIRN, një anëtar i KLGJ-së i tha BIRN në kushtet e anonimatit se verifikimi ishte rrëzuar, pasi shumica e anëtarëve të Komisionit të Zhvillimit të Karrierës dhe Këshillit mendonin çështjen duhet ta shqyrtonte ILD. Sipas tij, me shumë gjasa dosja do t’I përcillet ILD-së në fillimin e javës që vjen.
Pas një hetimi administrativ që zgjati rreth 20 muaj, Prokuroria e Përgjithshme deklaroi më 20 janar se kishte përfunduar verifikimin e thelluar për pastërtinë e figurës së gjyqtares së Gjykatës së Posaçme, GJKKO, Irena Gjoka, por rezultatin e verifikimit e mbajti të fshehtë.
Nga ana tjetër, Prokuroria e Posaçme, SPAK ka regjistruar procedim penal pas një kallëzimi të depozituar nga Adriana Kalaja ndaj gjyqtares Irena Gjoka, për fshehjen nga formulari i vetëdeklarimit të pastërtisë së figurës të një dënimi penal të dhënë nga drejtësia greke, për falsifikimin e një pasaporte dhe një vize në mesin e viteve 2000. Sipas SPAK, procedimi është regjistruar për veprën penale të parashikuar nga neni 190 i Kodit Penal, “falsifikimi i vulave, i stampave ose i formularëve”, por ende nuk është regjistruar ndonjë emër si person nën hetim.
Gjyqtarja Gjoka e ka kaluar më herët procesin e vetingut, pasi KPK nuk gjeti probleme që do të çonin në shkarkimin e saj. Komisioneri Publik fillimisht e ankimoi vendimin në Kolegjin e Posaçëm të Apelimit, por gjatë procesit në KPA, Komisioneri Publik u tërhoq nga ankimi duke lënë në fuqi vendimin e konfirmimit.
