Drejtuesi i Prokurorisë së Posaçme, Klodian Braho i kërkoi Kolegjit të Posaçëm të Apelimit, KPA të martën më 3 shkurt shkarkimin nga detyra të prokurorit të Tiranës, Gjergji Tako, për probleme në kriterin profesional dhe për etikën. Tako dhe përfaqësuesja e tij ligjore, avokatja Romina Zano i kundërshtuan shkaqet si të pamjaftueshme për të sjellë penalizim dhe kërkuan lënien në fuqi të konfirmimit.
Prokurori Braho deklaroi se çështjet e trajtuara në aspektin profesional i kanë ndarë në dy grupe, shkaqet që qëndrojnë dhe ato të shëruara nga shpjegimet dhe provat e dorëzuara nga subjekti gjatë parashtrimeve.
Sipas Brahos, mbeten probleme në 11 çështje të hetuara nga prokurori Tako. Drejtuesi i SPAK evidentoi mungesa të analizave të faktit penal, si dhe mungesë të hetimeve e verifikimeve të duhura.
Lidhur me një çështje të denoncuar nga shtetasi A.L., Braho konstatoi se të pandehurit nuk i është njoftuar përfundimi hetimeve dhe për rrjedhojë, kërkesa për gjykim është konsideruar e pavlefshme nga ana e gjykatës. Sipas Brahos, shkeljet procedural të subjektit janë evidentuar nga vetë gjykata dhe se ato nuk mund të korrigjohen përmes trajnimit në Shkollën e Magjistraturës,
Për 12 çështje të tjera të hetuara nga subjekti, drejtuesi i SPAK parashtroi se shkaqet e ngritura në këto raste konsiderohen të shëruara.
Në vijim, Brahoi konstatoi posedimin dhe përdorimin e dy automjeteve nga ana e prokurorit Gjergji Tako, pa kryer zhdoganimin, pa i regjistruar dhe pa leje qarkullimi. Sipas Brahos, në këto dy gjetje ka rrethana për cënim të besimit të publikut tek sistemi i drejtësisë.
Në përfundim, Braho kërkoi ndryshimin e vendimit të KPK dhe shkarkimin nga detyra të prokurorit Gjergji Tako.
Avokatja Romina Zano deklaroi se u qëndronin parashtrimeve. Ajo kërkoi që, për mangësitë e konstatuara në 11 çështjet për të cilat drejtuesi i SPAK tha se u qëndronte shkaqeve të ankimit, të konsiderohet koha se kur kanë ndodhur. Zano vërejti se rrethanat kanë të bëjë me ngarkesën e punës.
Në vijim, ajo nënvizoi se veprimtaria e Takos nuk rezulton të ketë cënuar ndonjë prej palëve. Po ashtu, Zano vërejti se vendimarrjet e subjektit janë të bazuara në ligjin e kohës dhe në praktikën e atëhershme. Sipas Zanos, prokurorit Tako nuk u mungon koherenca dhe logjika e arsyetimit, si dhe se rezulton se çështjet kanë marrë formë të prerë dhe nuk është konstatuar cënim i të drejtave të palëve. Ajo shtoi se kjo vërtetohet dhe nga fakti se palët nuk kanë ushtruar ankim.
Avokatja Zano deklaroi se në gjetjet e Komisionerit Publik nuk ka ndonjë tregues për favorizim apo cënim të interesit publik. Duke pretenduar se subjekti e ka ruajtur integritetin e tij, Zano i cilësoi gjetjet të pamjaftueshme për të sjellë penalizim.
Lidhur me zotërimin dhe përdorimin e dy automjeteve të pazhdoganuara, të paregjistruara e pa leje qëndrimi, avokatja Zano konstatoi se për një prej makinave, provat tregojnë se nuk është përdorur, por ka qëndruar e parkuar. Sipas saj, lëvizjet e këtij mjeti kanë qenë sporadike, vetëm për kryerje të shërbimeve për mirëmbajtje.
Zano parashtroi se ky mjet nuk është i përfshirë në ndonjë aksident dhe se nuk ka ndonjë padi civile për këtë pronë. Sipas saj, rrethanat e evidentuara në ankim nuk përbëjnë shkelje të rëndë dhe se nuk mund të konkludohet për cënim të besimit të publikut tek sistemi i drejtësisë.
Për automjetin tjetër, Zano konstatoi se pronari ka konfirmuar detyrimin e tij për zhdoganimin.
Konkluzionet për gjetjet lidhur me denoncimin, i paraqiti prokurori Gjeri Tako. Ai konstatoi se drejtuesi i SPAK nuk evidentoi mënyrën e delegimit të dosjes. Sipas Takos, ai ka bërë shënimin përkatës që të pandehurit t’i njoftohej akuza në afatin e duhur. Po ashtu, vërejti se në këtë çështje kishte kryer hetime dhe një prokuror tjetër, për të cilin tha se është trajtuar si statistikë, por pa peshën e tij.
“Mirë unë, por prokurori tjetër i çështjes, nuk ishte aty?”, vërejti Tako dhe tha se kjo rrethanë tregon për ngarkesën e madhe në punë.
Ai kërkoi që të lexohet vendimin për themelin, ku thuhet se kërkesa e prokurorit duhet pranuar. Sipas Takos, megjithëse thuhet se kërkesa për gjykim është e pavlefshme, ai akt po përdoret ende edhe sot në gjykimin e çështjes.
Në përfundim, prokurori Gjergji Tako kërkoi që vendimi i Komisionit për konfirmimin e tij në detyrë të mbetet në fuqi.
