Kolegji i Posaçëm i Apelimit, KPA njoftoi të martën më 3 shkurt lënien në fuqi të vendimit të Komisionit të Pavarur të Kualifikimit, KPK për konfirmimin në detyrë të ndihmëses ligjore pranë Gjykatës së Lartë, Aulona Bodo. Vendimi u mor në mënyrë unanime nga trupi gjykues i Kolegjit i kryesuar nga Rezarta Schuetz, me relatore Natasha Mulaj dhe anëtarë gjyqtarët Sokol Çomo, Albana Shtylla e Ina Rama, pas gjykimit në dhomë këshillimi të ankimit të Bodos ndaj vendimarrjes së Komisionit.
KPK vendosi më 19 shtator të vitit 2024 konfirmimin në detyrë të ndihmëses ligjore, Aulona Bodo, pasi u vlerësua pozitivisht në të tre kriteret e rivlerësimit.
Gjatë seancës dëgjimore të zhvilluar më 19 shtator 2024, ajo u shpreh se nuk kërkonte vetëm konfirmimin në detyrë, por edhe emërimin si gjyqtare. Bodo argumentoi atëherë se, në momentin kur është pranuar për të punuar si ndihmëse ligjore, për aplikimin kërkoheshin kritere të njëjta si për gjyqtarët. Ajo argumentoi se dhe trajtimi financiar, paga, ishte e njëjtë me gjyqtarët e për rrjedhojë duhej që pasi të konfirmohej, të emërohej si gjyqtare nga ana e Komisionit.
