Gjykata e Posaçme e Shkallës së Parë vendosi të premten më 6 shkurt deklarimin fajtor të katër të pandehurve për korrupsion aktiv e pasiv në zgjedhje gjatë fushatës së zgjedhjeve vendore të 14 majit 2023 për kreun e Bashkisë së Rrogozhinës. Po ashtu, u deklarua fajtor për moskallëzim krimi ish-kandidati i opozitës për kryetar bashkie në ato zgjedhje, Shkëlqim Hoxha.
Hoxha u dënua me 6 muaj burg, që në aplikim të gjykimit të shkurtuar u reduktua në 4 muaj heqje lirie. Ndërkohë, gjykata vendosi pezullimin e dënimit dhe caktoi detyrimin që ai të kryejë 60 orë punë me interes publik brenda një periudhe gjashtë mujore.
Katër të pandehurit e tjerë, Limon Shala, Fatmir Thaçi, Florant Saraçi e Engjëll Cara u dënuan me nga një vit e gjysmë burg, që në aplikim të gjykimit të shkurtuar reduktohet në 1 vit burg secili. Edhe në këtë rast, gjykata pezulloi masën e dënimit dhe i vendosi të katër në shërbim prove për një periudhë dy vjeçare.
Sipas SPAK, hetimet treguan se katër të pandehurit për korrupsion në zgjedhje, në bashkëpunim me njëri-tjetrin, në të paktën 64 raste kanë siguruar dhe ofruar bileta udhëtimi të parapaguara për persona të ndryshëm, me qëllim që të votonin në favor të kandidatit, Shkëlqim Hoxha, në zgjedhjet vendore të vitit 2023 në Bashkinë Rrogozhinë.
Në fillim të vitit 2025, u dënua për blerje votash në zgjedhjet e pjesshme të marsit 2022 për këtë bashki, kandidati socialist, Edison Memolla, i cili dhe u shpall fitues atëherë. Memolla arriti të fitojë edhe në zgjedhjet e 14 majit 2023, por për shkak të parregullsive të konstatuara u përsëritën dhe për të tretën herë u fituan sërish nga kandidati socialist, Edison Memolla.
