Gjykata e Posaçme e Apelit për Korrupsionin dhe Krimin e Organizuar vendosi të mërkurën më 11 shkurt heqjen e sekuestros mbi llogaritë bankare në bankat e nivelit të dytë në emër të Olsi Ibros, i identifikuar nga prokuroria si një nga drejtuesit e grupit të strukturuar kriminal të gjetur përgjegjës për skemat mashtruese të mikrokredive, me anë të të cilave ukanë zhvatur qytetarëve dhjetëra milionë euro. Ibro humbi jetën në korrik të vitit 2024, si pasojë e vetëvrasjes. Së bashku me të, akuzohen si drejtues të këtij grupi edhe bashkëshortja Elda Ibro dhe Arben Meskuti.
Në korrik të vitit 2024, Prokuroria e Tiranës sekuestroi kuotat dhe asetet e shoqërive të përfshira në këtë skemë, si dhe të llogarive bankare në emër të të hetuarve. Çështja u kalua për kompetencë në SPAK në muajin dhjetor të vitit 2024 dhe në korrik të 2025-ës u dërgua për gjykim.
Sipas dispozitivit të vendimit të gjyqtarit të Apelit të Posaçëm, Florian Kalaja, bazuar në ankimin e kryer nga familjarët e Ibros, u vendos pranimi i pjesshëm i pretendimeve të tyre e për rrjedhojë ndryshimi i vendimit të Gjykatës së Posaçmet të Shkallës së Parë për sekuestrimin e pasurive të të pandehurve në këtë çështje.
Gjyqtari Kalaja ka konstatuar absolutisht të pavlefshëm vendimin e Prokurorisë së Tiranës sa i takon disponimeve mbi llogaritë bankare në bankat e nivelit të dytë në emër të të hetuarit Olsi Ibro. Po ashtu, ai ka vendosur heqjen e sekuestros mbi llogaritë bankare në bankat e nivelit të dytë që rezultojnë në emër të Ibros, ndërsa janë rrëzuar si të pabazuara kërkesat e tjera të familjarëve të tij. Për zbatimin e këtij vendimi, është urdhëruar SPAK.
