Gjykata e Posaçme vendosi të mërkurën të dënojë me 12 vjet burg Astrit Avdylin, i akuzuar për pjesëmarrje në një grup të strukturuar kriminal në Shijak me aktivitet kryesor trafikun e lëndëve narkotike,. Vendimi u mor nga trupi gjykues i përbërë nga gjyqtaret Flojera Davidhi, Rudina Palloj dhe Elsa Ulliri, pas rigjykimit të çështjes ndaj këtij të pandehuri.
Për të njëjtat akuza, Astrit Balliu alias Avdyli alias Sulejmani, u dënua nga një tjetër trup gjykues në shkurt të vitit 2022, po me 12 vjet heqje lirie. Por, Gjykata e Posaçme e Apelit, në prill të vitit 2023 e prishi vendimin për Avdylin e një tjetër të pandehur duke e rikthyer për gjykim. Për katër të pandehur të tjerë, Apeli ndryshoi atëherë vendimarrjen e shkallës së parë, duke i ashpërsuar masat e dënimit ndaj tyre.
Hetimet për këtë grup nisën në vitin 2016 për dyshimet për trafik të lëndëve narkotike, por përgjimet e grupit kriminal dhe bashkëpunëtorëve të tyre në Durrës, Kavajë, Lezhë dhe Dibër, zbuluan mes të tjerash një angazhim të të dyshuarve në mbështetjen e zyrtarëve socialistë në fushatat e tyre zgjedhore në zgjedhjet e parakohshme në Dibër në 11 shtator 2016 si dhe më pas, në zgjedhjet e përgjithshme parlamentare të vitit 2017 – në të cilat Partia Socialiste arriti fitoren e vet më të madhe politike në 15 vjet.
