Deputetët e Partisë Demokratike, anëtarë të Komisionit për Reformën Territoriale morën pjesë në mbledhjen e së mërkurës pas një mungese dymujore, duke kërkuar garanci nga mazhoranca socialiste që reforma do të bëhet me konsensus politik.
Rikthimi i PD-së në komision solli tërheqjen e Partisë Socialiste nga një iniciativë për të ndryshuar formulën e përbërjes dhe strukturën vendimmarrëse të këtij komisioni, çka rrezikonte një reformë të njëanshme.
Bashkëkryetari demokrat i komisionit, Luçiano Boçi kërkoi nga PS garanci që konsensusi me të cilin u ngrit komisioni të funksionojë deri në fund, ndërsa justifikoi mungesën e PD-së me situatën e polarizuar politike në Kuvend.
“Komisioni i ngritur me konsensus duhet të ketë një produkt të vetëm në fund në bazë të paritetit që kemi vendosur,” tha Boçi, duke i kërkuar bashkëkryetarit socialist Arbjan Mazniku që ky konsensus të vuloset me anë të një vendimi të komisionit.
Në përgjigje, Mazniku tha se mazhoranca po ashtu ishte e interesuar dhe synonte një reformë që të kishte mbështetje të gjerë politike.
“Ka pasur mjaftueshëm shprehje vullneti të mazhorancës që kjo reformë të kalojë me unanimitet dhe kemi dhënë prova për mirëbesim,” tha ai.
Me rinisjen e punës, komisioni shqyrtoi planin e punës dhe miratimin e listës së ekspertëve duke vendosur nisjen e procesit me konsultime publike nëpër qarqe.
Iniciativa për një reformë të re territoriale vjen një dekadë pas miratimit të një reformë territoriale të miratuar në vitin 2014 që shkriu komunat dhe ndau hartën administrative në 61 bashki e 12 qarqe.
Komisioni synon të rimarrë në shqyrtim funksionimin e kësaj reforme dhe nevojën për ndryshime të reja.
Në objektivat e ngritjes së komisionit të ri parashikohet shqyrtimi i kuadrit ligjor dhe institucional të qeverisjes vendore; opsione të reja për ridizenjimin territorial dhe forcimin e kapaciteteve administrative të njësive të qeverisjes vendore;analizë e sistemit të financave vendore, etj..
