Për Redi Mollën u kërkuan 11 vjet burg për korrupsion pasiv në shtatë raste, për fshehje pasurie në pesë raste dhe për pastrim parash. Ndërsa për Mariglen Qaton u kërkua dënimi me 9 vjet burg për korrupsion pasiv në katër raste, si dhe për pastrim parash dhe fshehje pasurie.
Prokuroria e Posaçme, SPAK, paraqiti të martën më 17 shkurt konkluzionet përfundimtare ndaj dy ish-drejtorëve të Bashkisë së Tiranës, Redi Molla dhe Mariglen Qato, si dhe pesë të akuzuarve si bashkëpunëtorë të tyre, në një skemë korrupsioni dhe pastrimi parash të kryer nëpërmjet kompanisë “5D Konstruksion”. Gjykimi ndaj këtyre të pandehurve u zhvillua me gjykim të zakonshëm.
Prokurorja Anita Jella kërkoi deklarimin fajtor të të pandehurit Redi Molla dhe dënimin e tij për korrupsion pasiv në shtatë raste, për fshehje pasurie në pesë raste dhe për pastrim parash. Në përfundim, u kërkua dënimi i Mollës me 11 vjet heqje lirie, si dhe dënimi plotësues për ndalimin e ushtrimit të funksioneve publike për 5 vjet.
Për bashkëpunëtorin e tij të ngushtë, njëkohësisht i cilësuar nga SPAK si bashkëposedues i kompanisë 5D, të pandehurin Mariglen Qato, u kërkua dënimi total me 9 vjet burg për korrupsion pasiv në katër raste, si dhe për pastrim parash dhe fshehje pasurie. Po ashtu, u kërkua dënimi plotësues për të mos ushtruar funksione publike për 5 vjet.
Për të pandehurin Tulant Tusha u kërkua dënimi me 4 vjet burg për shkelje të barazisë në tendera në tre raste; për të pandehurin Enton Punavija 3 vjet burg për të njëjtën vepër penale në tre raste; ndaj Julian Zanajt u kërkua dënimi po me 3 vjet burg për shkelje të barazisë në tendera në dy raste; ndërsa për Albano Jankun 2 vjet heqje lirie po për këtë vepër penale në një rast. Edhe për këta të pandehur u kërkua dënimi plotësues për ndalimin e ushtrimit të funksioneve publike për 5 vjet.
Prokurorja Jella kërkoi po ashtu deklarimin fajtor të të pandehurit Nestor Muhamtllari dhe dënimin e tij përfundimtar me 7 vjet burg për korrupsion pasiv në dy raste dhe pastrim parash. Për shoqërinë 5D u kërkua të deklarohet mbarimi i veprimtarisë dhe të konfiskohet.
SPAK kërkoi edhe konfiskimin e aseteve të kësaj pasurie, të kompanisë “Restur” dhe aseteve të saj, si dhe të 24% të aksioneve të kompanisë “Mediterranean Investment Group” sh.p.k., e cila po ndërton një hotel me vlerë të deklaruar 15 milionë euro dhe që ka marrë statusin “special” nga ana e qeverisë së kryeministrit Edi Rama.
Kompania “5D Konstruksion” u vu nën hetim nga prokuroria pas një denoncimi të kandidatit të opozitës për postin e kryebashkiakut të Tiranës, Belind Këlliçi, i cili deklaroi në vitin 2023 se kompania u përket drejtorëve të bashkisë, pavarësisht se rezulton në pronësinë e një qytetari tjetër.
Në prill të këtij viti, prokurorët arrestuan Redi Mollën dhe Mariglen Qaton, dy drejtues jetëgjatë të Bashkisë Tiranë gjatë qeverisjes së kryetarit Erion Veliaj, dhe i akuzuan për manipulim tenderësh, korrupsion dhe pastrim parash. Krahas tyre u vendosën në masa sigurie edhe disa drejtorë të tjerë të bashkisë, të cilët akuzohen për manipulim të tenderëve.
Kompania 5D, e cila ka pasur të ardhura bruto prej 22 milionë eurosh mes viteve 2016 dhe 2022, është zgjeruar gjatë viteve të fundit në ndërtim pallatesh, ndërsa një prej aksionerëve të saj, Redi Molla, ka hyrë si investitor në hotelin me status special në Durrës. Edhe në konkluzionet përfundimtare, SPAK iu përmbajt kërkimit të mëparshëm për konfiskimin e 24% të aksioneve të kontrolluara nga Molla në kompaninë e hotelit, që vijon të administrohet nga pronarët.
