Gjykata e Posaçme e Shkallës së Parë vendosi më 17 shkurt të deklarojë fajtorë dy të pandehurit Kalosh Peposhi dhe Gazmend Peposhi, të akuzuar për korrupsion aktiv në bashkëpunim gjatë zgjedhjeve të përgjithshme të 11 majit të vitit të kaluar në qarkun e Kukësit.
Trupi gjykues i përbërë nga gjyqtarët Flojera Davidhi, Bib Ndreca dhe Flora Hajredinaj vendosi dënimin e të pandehurit Kalosh Peposhi me 1.7 vjet burg dhe të Gazmend Peposhit me 1.9 vite burg. Dy të pandehurit përfituan nga gjykimi i shkurtuar, ndërkohë që gjykata urdhëroi lirimin e menjëhershëm të njërit prej tyre për shkak se e ka kryer dënimin.
Sipas SPAK, nga hetimet ka rezultuar se dy të pandehurit Peposhi janë përfshirë në veprimtari të kundërligjshme në qarkun e Kukësit, gjatë zgjedhjeve te fundit për Kuvendin e Shqipërisë. Gjatë fushatës zgjedhore, të pandehurit, në bashkëpunim me njëri-tjetrin, u kanë premtuar dhe dhënë shuma monetare zgjedhësve te Njësisë Administrative Unmisht, në këmbim të votës së tyre në favor te Partisë Socialdemokrate të Shqipërisë.
SPAK parashtroi në gjykatë se hetimi ka evidentuar se të pandehurit kanë qenë aktivë në fushatën zgjedhore në mbështetje të këtij subjekti politik, duke ofruar dhe shpërndarë mjete monetare ndaj zgjedhësve për të ndikuar në mënyrën e votimit të tyre.
