Ish-zv/kryeministri i parë Artan Grubi, i cili ka qenë në arrati për më shumë se një vit, u ndalua herët të hënën në mëngjes pasi u paraqit në pikën kufitare të Bllacës midis Kosovës dhe Maqedonisë së Veriut.
Ministria e Brendshme e Maqedonisë së Veriut tha se e kapi Grubin që në pikën e hyrjes, pasi ai ishte “në kërkim sipas një urdhër arresti ndërkombëtar lidhur me hetimin e një krimi”.
Grubi, zëvendëskryeministër i parë nga viti 2020 deri në vitin 2024 dhe Ministër për Sistemin Politik dhe Marrëdhëniet Ndërkomunitare, nga Bashkimi Demokratik për Integrim, BDI, tani në opozitë, ishte në arrati që nga dhjetori i vitit 2024.
Ai u zhduk pikërisht kur prokuroria e përmendi atë si një nga të dyshuarit për përvetësimin e më shumë se 8 milionë eurove nga lotaria shtetërore. Ai thuhet se fshihej ose në Kosovën fqinje ose në Shqipëri. Ai u zhduk gjithashtu menjëherë pasi, më 9 dhjetor të atij viti, Departamenti Amerikan i Shtetit shtoi emrin e tij dhe atë të gjyqtarit Enver Behxheti në listën e tij të zezë “për përfshirjen e tyre në korrupsion madhor duke pranuar ryshfete për të minuar proceset gjyqësore të lidhura me dënimin penal të Saso Mijalkovit”, ish-kreut të policisë sekrete të Maqedonisë së Veriut.
Grubi i mohoi akuzat e SHBA-së dhe njoftoi tërheqjen e tij nga politika.
Grubi ishte një figurë e lartë në politikën e Maqedonisë së Veriut për më shumë se një dekadë para vitit 2024. Ai shihej si një krah i djathtë jozyrtar i kryetarit të hershëm të BDI-së, Ali Ahmeti – dhe madje shihej si pasardhësi i tij i mundshëm në një kohë.
