Gjykata e Posaçme e Apelit për Korrupsionin dhe Krimin e Organizuar rrëzoi të martën një ankim nga kryebashkiaku i Tiranës, Erion Veliaj, ndaj një vendimi të Gjykatës së Posaçme të Shkallës së Parë, e cila kishte refuzuar kërkesën për lirim me garanci pasurore të bërë nga Veliaj.
Vendimi u mor nga gjyqtarja Nerina Kosova. Në një njoftim për shtyp, Gjykata e Posaçme e Apelit bëri me dije se Veliaj kishte kërkuar: “Zëvendësimin e masës së sigurimit ‘Arrest në burg’, parashikuar nga neni 238 i K.Pr.Penale, me një masë sigurimi më të butë si ‘Garancia pasurore’, parashikuar nga neni 236 i K.Pr.Penale ose ‘Detyrimi për t’u paraqitur në policinë gjyqësore’, parashikuar nga neni 234 i K.Pr.Penale”. Ky kërkim u rrëzua më 1 shkurt nga Gjykata e Posaçme dhe Apeli vendosi të lërë në fuqi këtë vendim.
“Miratimin e vendimit nr. 118, datë 01.02.2026, të Gjykatës së Posaçme të Shkallës së Parë për Korrupsionin dhe Krimin e Organizuar”, thuhet në njoftimin për shtyp.
Erion Veliaj u arrestua më 10 shkurt 2025, pasi akuzohet se, së bashku me bashkëshorten Ajola Xoxa, ndërtuan një skemë komplekse korrupsioni dhe pastrimi parash për të përfituar në mënyrë të paligjshme nga fondet e bashkisë së kryeqytetit dhe ryshfete nga biznesmenë kontraktorë të saj, duke përdorur një rrjet kompanish dhe organizatash jofitimprurëse.
Sipas SPAK, kryebashkiaku i kryeqytetit dhe bashkëshortja e tij kanë përfituar rreth 1 milion euro nga kjo skemë korruptive, para të cilat janë përdorur kryesisht për blerje luksoze në internet nga Ajola Xoxa.
Çështja ndaj Veliajt dhe të tjerëve kaloi për gjykim më 9 shkurt të këtij viti.
