Prokuroria e Posaçme, SPAK paraqiti të martën konkluzionet përfundimtare ndaj Rezart Taçit, ish-biznesmenit kontrovers të naftës, duke kërkuar deklarimin e tij fajtor për veprat penale të pastrimit të parave dhe grupit të strukturuar kriminal.
Taçi është shpallur në kërkim që prej nëntorit 2021, si pjesë e një grupi të ndaluar në Itali me akuzën e pastrimit të parave të Cosa Nostra. Ai akuzohet se u përfshi në një përpjekje për të pastruar një shumë prej 18,3 milionë eurosh në Shqipëri, të cilat prokuroria i bllokoi në një llogari bankare si pjesë e procedimit.
Taçi dhe dy avokatët e tij nuk ishin të pranishëm në seancë. Teksa trupi gjykues ishte duke vendosur për shtyrjen e seancës, u paraqit avokati i caktuar kryesisht, Artan Simoni dhe procesi u rifillua duke iu dhënë fjala prokurorit Klodian Braho për të paraqitur konkluzionet përfundimtare.
Braho kërkoi dënimin e Taçit me 12 vjet burg për pastrim parash dhe 2 vjet heqje lirie për grup të strukturar kriminal. Në bashkim të dënimeve, Braho kërkoi përfundimisht 13 vjet heqje lirie për të pandehurin Rezart Taçi. Po ashtu, u kërkua konfiskimi i vlerës prej 18.3 milionë euro që transferua prej Zvicrës në Shqipëri, që më vonë të pandehurit kishin synim ta kalonin në Hong Kong.
Seanca e radhës u caktua më datë 3 mars, në orën 13:15. Prokurori Braho autorizoi prokurorin Dritan Prençi për ta përfaqësuar në seancat e ardhshme.
Çështja në ngarkim të të pandehurve të tjerë u veçua nga Taçi, pasi ndaj këtij të fundit u vijua gjykimi me procedurë të zakonshme. Më 25 prill 2023, Gjykata e Posaçme deklaroi fajtorë dhe dënoi dy të besuarit e Rezart Taçit në këtë veprimtari kriminale, Artur Ballën dhe Bledar Lilon, vendimarje që u la në fuqi nga Apeli në muajin tetor.
Sipas SPAK, skema financiare është drejtuar nga Zummo dhe Petruzella, në bashkëpunim me një shtetas zviceran me origjinë italiane dhe ish-bosin shqiptar të naftës, Rezart Taçi.
