Prokuroria e Posaçme, SPAK paraqiti të enjten më 26 shkurt konkluzionet përfundimtare në çështjen e veçuar ndaj të biznesmenit Pëllumb Gjoka dhe ish-funksionarit të policisë, Ardit Hasanbegajt, të akuzuar për sigurim të kushteve dhe mjeteve për të kryer vrasje, grup kriminal dhe armëmbajtje pa leje. Për të dy të pandehurit u kërkua që të deklarohen fajtor. Për biznesmenin Pëllumb Gjoka u kërkua dënimi me 14 vjet burg, ndërsa për Hasanbegajn 9 vjet heqje lirie. Gjykimi në këtë proces u zhvillua me gjykim të shkurtuar, prej nga të pandehurit përfitojnë uljen e 1/3-ës së dënimit nëse deklarohen fajtorë.
Ndërkohë, çështja penale ka dhe një tjetër ndarje, ku tre prej të pandehurve Pëllumb Gjoka, Behar Brajoviq dhe Edmond Preka po gjykohen veçmas për akuzat për vrasje.
Më 18 nëntor të vitit të kaluar, Gjykata e Posaçme e Shkallës së Parë shpalli masat e dënimit për pesë të pandehurit e tjerë të çështjes penale të quajtur “Metamorfoza”.
Për pesë të pandehurit Behar Brajoviç, Edmond Preka, Astmer Bilali, ish-prokurorin Xhevahir Lita dhe ish-drejtorin e njësisë së Operacionales në Policinë e Shtetit, Oltion Bistri, gjykata dha në total 26.6 vjet burg nga 34 vjet që kishte kërkuar SPAK – masa të cilat do të reduktohen me 1/3 për shkak të gjykimit të shkurtuar.
Ish-prokurori Xhevahir Lita dhe ish-kreu i njësisë Operacionale, Oltion Bistri përfituan lirim të menjëhershëm, pasi dënimi i dhënë nga gjykata ishte më i vogël se sa koha që ata kaluan në paraburgim. Lita u gjet fajtor për korrupsion, ndërsa Bistri u shpall i pafajshëm për këtë akuzë dhe për pastrimin e parave.
Hetimi ndaj Gjokës dhe të pandehurve të tjerë filloi pas mbërritjes së një dosjeje nga Franca. Ndaj tij dhe anëtarëve të tjerë të grupit ka nëntë lloj akuzash për vepra penale, mes të cilave vrasje, korrupsion aktiv e pastrim parash, të kryera në kuadër të grupit të struktuar kriminal. Ndërsa zyrtarët e arrestuar si pjesë e organizatës akuzohen për korrupsion, zbulim të akteve apo të dhënave sekrete, si dhe për sigurimin e kushteve dhe mjeteve për të kryer vrasje.
