Prokuroria e Posaçme kundër Korrupsionit dhe Krimit të Organizuar paraqiti të premten konkluzionet përfundimtare në çështjen penale në ngarkim të zyrtarëve të Universitetit Bujqësor të Tiranës, UBT, mes të cilëve edhe dy zv.rektorët, të cilët akuzohen për shkelje në procedurat e tenderave.
Në të njëjtën çështje, përfaqësuesit e kompanisë “Krijon” akuzohen për veprën penale të falsifikimit të dokumenteve të kryer në bashkëpunim.
Për administratorin e UBT-së, Edmond Tërthorja dhe tre të pandehurit Amarildo Lleshi, Serafin Skënderi dhe Altin Murto u kërkua dënimi me nga 3 vjet burg për secilin, që në aplikim të gjykimit të shkurtuar reduktohet në 2 vjet. Po ashtu, u kërkua dënimi plotësues për heqjen e të drejtës për ushtruar funksione publike për 5 vjet.
Për zv.rektorët Romina Koto dhe Ilir Kapaj dhe 17 të akuzuarit e tjerë u kërkuan dënime nga 1 vit deri në 1.6 vjet burg – masa të cilat pezullohen në këmbim të vendosjes së tyre në shërbim prove.
Pesë të pandehurit e tjerë, Ilir Kusi, Dritan Laçi, Piro Zoga, Bejo Bizhga dhe Arjan Buliaj po gjykohen veçmas me procedurë të zakonshme.
Seanca e radhës kur përfaqësuesit ligjorë të te pandehurve do paraqesin bisedimet përfundimtare u shty për më datë 18 mars.
Sipas SPAK, në kuadër të këtij procedimi penal janë hetuar 9 procedura prokurimi të zhvilluara në vitin 2022, me një vlerë të fondit limit prej 90 milionë lekësh. Gjatë hetimit janë evidentuar shkelje ligjore të personave përgjegjës të stafit akademik në UBT, të pandehurit Romina Koto dhe Ilir Kapaj në detyrën e zëvendësrektorit, Bejo Bizhga, me detyrë Përgjegjës i Departamentit të Moduleve Paraklinike që konsistojnë në ideimin e projekteve dhe sigurimin e fondeve pranë Agjencisë Kombëtare për Kërkimin Shkencor dhe Inovacionin (AKKSHI), si edhe veprime të kundraligjshme të kryera në bashkëpunim me titullarin e autoritetit kontraktor, të pandehurin Edmond Tërthorja, me detyrë Administrator i UBT-së.
Po ashtu, janë evidentuar shkelje ligjore të të pndehurve të tjerë për te cilët u kërkua deklarimi fajtoreë, anëtarë të njësisë së prokurimit dhe komisionit të vlerësimit të ofertave, të cilët akuzohen se kanë krijuar kushte dhe favorizuar shpalljen fitues të operatorëve ekonomikë “Krijon”sh.p.k.; “Zero Group” sh.p.k. dhe “Malvina Visoka PF”.
