Prokuroria e Posaçme kundër Korrupsionit dhe Krimit të Organizuar, SPAK njoftoi të martën se ka kërkuar në gjykatë konfiskimin e pasurive të sekuestruara në kuadër të hetimit pasuror ndaj Jusel Micit dhe Mendim Domit, të akuzuar si organizatorë të një grupi të strukturuar kriminal, që nëpërmjet mashtrimit online në Shqipëri dhe Itali u zhvatën shtetasve evropianë miliona euro.
Hetimi pasuror ndaj tyre dhe personave të lidhur me ata është zhvilluar bazuar në ligjin e njohur si “Antimafia”, prej nga ka rezultuar se pasuritë e sekuestruara në fazën paraprake nuk janë të justifikuara me burime të ligjshme. Për rrjedhojë është kërkuar konfiskimi pasurive të sekuestruara, apartamente e njësi shërbimi në Tiranë; një ngastër toke; disa garazhe; 40% të kuotave të shoqërisë tregtare “Super Foods”; dy vila në Gjirin e Lalzit në Durrës, dy automjete dhe tre llogari bankare dhe llogari bankare, me vlerë totale mbi 2 milion euro.
Hetimi ndaj Micit dhe Domit filloi bazuar në kërkesën për ndihmë të ndërsjelltë të Prokurorisë së Pizës në Itali, e cila po hetonte në kuadër të procedimit penal kundër të hetuarve Stefano Matteo Tonarelli, Gianmario Perico, Jusel Mici, etj, për veprat penale të “Mashtrimit në rrethana rënduese”, në formën e grupit të strukturuar kriminal. Sipas SPAK, të akuzuarit Mici dhe Domi janë organizatorë dhe pjesëtarë të grupit të strukturuar kriminal.
Mashtrimi “on line” lidhej me investime në letra me vlerë dhe kriptovaluta. Po ashtu, janë përdorur shoqëritë fiktive Capitalcom Investment, Direct Coin Limited, Lead Secure Ltd, Finex Group Ltd, Futurus XOU, Luxor, Mm Consulting S.R.S.S., Scs Smart Coomunications Services S.R.L.S Estra dhe të tjera, për kalimin e vlerave monetare të mashtrimit.
Këto shoqëri janë përdorur për të hapur llogari rrjedhëse të huaja në Lituani, Britani e Madhe, Belgjikë, Luksemburg, Gjermani dhe Itali dhe duke menaxhuar faqe interneti që reklamonin aktivitetin. Gjithashtu janë përdorur edhe qëndra thirrje të llojit call-center, në Itali dhe Shqipëri, nëpërmjet të cilave kontaktoheshin viktimat, duke i bindur të bëheshin pjesë e programeve të rreme të investimit.
Sipas SPAK, autorët u propozonin viktimave të derdhnin shuma të konsiderueshme parash nëpërmjet transferimeve on line në llogaritë rrjedhëse të huaja të kompanitë fiktive. Me marrjen e menjëhershme të këtyre shumave, ato zhdukeshin duke u konvertuar kryesisht në kriptovaluta.
Në qershor të vitit të kaluar, Mici dhe Domi u deklaruar fajtorë nga Gjykata e Posaçme e Shkallës së Parë dhe përkatësisht me 8 vjet burg i pari dhe tjetri me 7 vjet e 4 muaj heqje lirie. Po ashtu, në procesin penal u vendos edhe konfiskimi i tre apartamenteve; shtatë ngastrave tokë e llojit arë me sipërfaqe totale 23 mijë e 539 m2; si dhe i tre llogarive bankare me gjendje 195 mijë euro dhe 969 mijë lekë
