Kryetari i grupit parlamentar demokrat, Gazment Bardhi kundërshtoi të mërkurën propozimet e njëanshme të socialistëve për ndryshime në Rregulloren e Kuvendit, duke i konsideruar ato si diktim i njëanshëm i rregullave të bashkëjetesës.
“Rregullorja e Kuvendit nuk është Statuti i PS, që ndryshohet çdo muaj sipas vullnetit të vetëm një partie politike”- shkruajti ai në një reagim në platformën facebook, duke shtuar se “nëse një palë dikton rregullat e bashkëjetesës në mënyrë të njënashme, atëherë kjo është dhunë e shumicës ndaj pakicës brenda Kuvendit”.
Më tej, Bardhi e konsideron këto propozime si provokim ndaj opozitës dhe pamundësim të rolit të saj në Parlament.
Të martën tre deputetë të PS-së depozituan një draft për ndryshimin e rregullores së Kuvendit, pas vendimit të Gjykatës Kushtetuese që rrëzoi rregulloren aktuale për shkak të miratimit të saj në shkelje të procedurës.
Në draftin e firmosur nga deputetët Taulant Balla, Erion Malaj dhe Erjo Mile, rikonfirmohet arkitektura e kuvendit me 11 komisione të përhershme, që u miratua në fillim të punës së kësaj legjislature, ndryshime që u kundërshtuan nga opozita dhe u rrëzuan në Gjykatën Kushtetuese në 23 shkurt për shkelje të procedurave parlamentare.
PS ka shtuar dhe propozime të reja që parashikojnë kufizim të mëtejshëm të kohës që deputetët dhe grupet parlamentare marrin në seancat plenare, disa shtesa sa i përket kompetencave të Komisionit të Përhershëm për Nismat Qytetare që drejtohet deri tani nga socialisti Fatmir Xhafaj.
Po ashtu, draft-rregullorja e PS i hap rrugë miratimit me procedurë të përshpejtuar të ligjeve që kanë të bëjnë me Marrëveshjen e Stabilizim-Asociimit.
Dokumenti ligjor që rregullon jetën parlamentare është një dokument i miratuar me konsensus politik në vitin 2012 si një rekomandim i Komisionit Europian, por mazhoranca socialiste ndër vite ka përdorur forcën e kartonave për të miratuar ndryshime të njënashme në këtë dokument pavarësisht kundërshtimeve të opozitës.
