Kolegji i Posaçëm i Apelimit (KPA) njoftoi të enjten, më 5 mars, vendimin për lënien në fuqi të shkarkimit nga detyra të ndihmëses ligjore pranë Gjykatës së Apelit të Juridiksionit të Përgjithshëm, Majlinda Tosku. Vendimi u mor në mënyrë unanime nga trupi gjykues i KPA-së, i kryesuar nga gjyqtarja Ina Rama, me relatore Natasha Mulajn dhe anëtarë Mimoza Tasi, Rezarta Schuetz dhe Sokol Çomo, pas shqyrtimit në dhomë këshillimi të ankimit të Toskut ndaj vendimmarrjes së Komisionit për largimin e saj nga detyra.
Vendimi i KPA-së është përfundimtar dhe ka efekt të menjëhershëm.
Komisioni i Pavarur i Kualifikimit (KPK) e shkarkoi ndihmësen ligjore Majlinda Tosku më 13 shkurt 2024, pasi arriti në përfundimin se ajo kishte cenuar besimin e publikut me veprimet dhe mosveprimet e saj lidhur me marrjen dhe shlyerjen e disa kredive para fillimit të detyrës, nënshkrimin e një kontrate premtim-shitje të konsideruar fiktive, si dhe me qëndrimin gjatë procesit të rivlerësimit, i vlerësuar si jobashkëpunues.
