Prokuroria e Posaçme, SPAK njoftoi të mërkurën më 11 mars përfundimin e hetimeve ndaj tre shtetasve ukrainas, të akuzuar për trafikim të qenieve njerëzore dhe grup të strukturuar kriminal, që rezulton të jenë pjesë e një grupi më të madh ndërkombëtar të trafikimit të lëndëve narkotike me veprimtari në disa vende të ish-Bashkimit Sovjetik. Çështja penale në ngarkim të të pandehurve Nazar Khamuilo, Mark Petrenko dhe Karol Oskiera është dërguar në gjykatë për t’u kaluar për shqyrtim. Ndërkohë, është kërkuar pushimi i akuzës për tre persona të tjerë, pjesë e këtij hetimi, po shtetas të huaj.
Në njoftim sqarohet se hetimi ka filluar bazuar në një ankesë elektronike të dërguar pranë Policisë së Vlorës nga Ambasada e Ukrainës në Shqipëri, ku parashtrohej se një shtetas i atij vendi mbahej dhe detyrohej të punonte kundër dëshirës së tij në qytetin bregdetar. Pas verifikimeve paraprake, policia ka identifikuar disa shtetas ukrainas që jetonin me qira në një banesë në lagjen “Demokracia”, të cilët dispononin pajisje komjuterike të lëvizshme që I përdornin për të punuar në aplikacione të ndryshme.
Sipas SPAK, ata dërgonim mesazhe dhe linqe me anë të programeve automatike, me qëllim rekrutimin e personave të tjerë për përpunimin, transportin dhe shitjen e lëndëve narkotike në shtete të ndryshme të Evropës Lindore. Po ashtu, është konstatuar se shumica e personave nuk ishin të pajisur me pasaporta. Në njoftim konstatohet se është e provuar se, ky grup kriminal i vendosur në Shqipëri, ishte pjesë e një grupi më të madh ndërkombëtar të trafikimit të lëndëve narkotike, i cili vepron në disa vende të ish-Bashkimit Sovjetik.
Nga hetimet është zbuluar se anëtarët e grupit, nën presionin e dhunës dhe kërcënimeve nuk i lejonin shtetasit e trafikuar që të largoheshin nga puna dhe nga Shqipëria. Ata u tregonin video dhune të ushtruar ndaj personave të tjerë, të cilët nuk arrinin rezultatet e kërkuara në punë.
Personat e trafikuar e të shfrytëzuar, rekrutoheshin përmes aplikacionit Telegram, me premtim për një punë ‘zyre’ në Poloni. Ata nuk ishin në dijeni të natyrës së vërtetë të punës dhe në fazën e rekrutimit i nënshtroheshin intervistës dhe testit të poligrafit në Varshavë. Më vonë dërgoheshin në Shqipëri, ku ishin të detyruar që gjatë kohës së qëndrimit të përdornin pesudonime dhe mos të thërrisnin njëri-tjetrin me emrat përkatës.
Në qytetin e Vlorës janë zbuluan tre ambiente ku mbaheshin në kushte banimi dhe pune personat e rekrutuar. Në total janë gjetur dhe sekuestruar 24 pasaporta të shtetasve të shtetasve të huaj që dyshohet se kanë punuar në këto tre ambiente për disa javë ose muaj.
