Vendimi u mor nga trupi gjykues i përbërë nga gjyqtarët Erjon Bani, Flojera Davidhi dhe Elsa Ulliri, të cilët çmuan se ndjekja penale ndaj të pandehurve ishte parashkruar.
Prokuroria e Posaçme Kundër Korrupsionit dhe Krimit të Organizuar, SPAK, e kishte dërguar çështjen për gjykim në qershor të vitit të kaluar ndaj zyrtarëve të ARRSH-së Arbër Troka, Miranda Shkurti, Nikollaq Mihali, Almir Hoxhaj, Erion Zemenaj dhe Admir Pahumi. Ata akuzoheshin për veprën penale “Shkelje e barazisë së pjesëmarrësve në tendera apo ankande publike”.
Sipas SPAK, hetimi kishte në fokus tenderin për “Rehabilitimin e segmentit rrugor ‘Mbikalimi Pallati me Shigjeta – Rethrrotullimi Shqiponja’, Loti 1”, me fond limit 2.25 miliardë lekë pa TVSH, të zhvilluar në vitin 2019. Nga hetimet u arrit në përfundimin se të pandehurit kishin kryer një sërë shkeljesh gjatë procedurës së prokurimit të zhvilluar nga ARRSH, duke dëmtuar interesat ligjorë të shtetit.
Prokurori i çështjes, Elvin Gokaj, i tha BIRN gjatë një bisede telefonike të premten se do të ushtrojë ankim ndaj vendimit të gjykatës, pasi pushimi i akuzës është bazuar në një aspekt procedural që lidhet me parashkrimin e ndjekjes penale.
Tenderi i parë për ndërtimin e këtij segmenti të Unazës së Re, me fond limit po prej 2.25 miliardë lekësh, u hap në shtator të vitit 2018 dhe u fitua nga kompania DH Albania, e cila më vonë rezultoi një kompani fantazmë.
Pas publikimit në emisionin “TPZ” të të dhënave që tregonin se kompania kishte paraqitur dokumente të falsifikuara në ARRSH, u nis një hetim penal. ARRSH pranoi se dokumentet ishin të falsifikuara dhe vendosi të rihapte tenderin, i cili pas disa procedurash përfundoi duke shpallur fitues bashkimin e operatorëve “Salillari” shpk dhe “Bajrami N” shpk. Gjatë procesit të prokurimit u skualifikuan të gjithë operatorët e tjerë konkurrues.
Një hetim i mëparshëm për këtë aferë, i kryer nga Prokuroria e Tiranës, ngriti akuza vetëm ndaj 28-vjeçarit Avdjol Dobi, administrator i kompanisë DH Albania, për falsifikim në përfitimin e dy tenderave me vlerë totale 3.4 miliardë lekë. Dobi u dënua me 6 muaj burg, ndërsa prokuroria pushoi hetimet ndaj zyrtarëve të ARRSH-së, OST-së dhe Ministrisë së Infrastrukturës dhe Energjisë.
