Prokuroria e Posaçme njoftoi të mërkurën se i kishte kërkuar gjykatës pushimin e hetimit ndaj gjyqtares Irena Gjoka, e kallëzuar për veprën penale të falsifikimit pas pretendimeve se ajo kishte fshehur një dënim penal të dhënë nga drejtësia greke.
Edhe pse është konfirmuar dënimi nga drejtësia greke ndaj gjyqtares Gjoka për përdorimin e dokumenteve të parregullta për të hyrë në Greqi, SPAK thotë se nuk e ka provuar që asaj i është komunikuar dënimi, ndërkohë që vepra penale është e parashkruar.
Sipas njoftimit të SPAK, dokumentacioni i përcjellë nga autoritetet greke të drejtësisë tregon se gjyqtarja Irena Gjoka, alias Shpata, alias Maneku është dënuar nga Gjykata e Shkallës së Parë Janinë me burgim dhe gjobë, i konvertuar në gjobë.
“Materialet e administruara tregojnë se Irena Gjoka ka qenë subjekt i procedurave administrative dhe gjyqësore në Greqi, pas dy episodeve në kufi, ku është konstatuar përdorimi i dokumenteve të parregullta dhe tentativa për hyrje me të dhëna të ndryshme identifikuese. Si pasojë, ndaj saj janë marrë masa administrative, përfshirë dëbimin dhe ndalimin e hyrjes në zonën Schengen, të cilat janë kundërshtuar prej saj në gjykatat administrative greke,” thuhet në njoftim.
Nga ana tjetër, SPAK vëren se gjykimi penal ndaj Gjokës është zhvilluar në mungesë të saj, ndërsa njoftimi është realizuar sipas procedurave për persona me vendbanim të panjohur. SPAK vlerëson se, nuk rezulton të ketë dokumentacion që provon se Gjoka është njoftuar realisht për procesin dhe shpalljen e vendimit.
Një tjetër argument i përdorur nga SPAK për pushimin e çështjes penale është parashkrimi i veprës penale. Sipas SPAK, nga analiza e akteve rezulton se, edhe nëse do të merrej e mirëqenë ekzistenca e këtij vendimi penal, ndjekja penale lidhur me këtë fakt rezulton e shuar për shkak të parashkrimit.
“Duke marrë në konsideratë mungesën e njoftimit të rregullt, zhvillimin e gjykimit në mungesë, si dhe kalimin e afateve ligjore të ndjekjes penale, konstatohet se nuk ekzistojnë kushtet ligjore për vijimin e mëtejshëm të ndjekjes penale për këtë çështje dhe se nuk provohet qëmagjistratja Irena Gjoka të ketë kryer veprën penale,” argumenton SPAK.
Prokuroria e Posaçme nisi hetimet për Gjokën pas një kallëzimi të bërë nga Adriana Kalaja. Paralelisht, Inspektori i Lartë i Drejtësisë, ILD ka filluar një hetimin disiplinor ndaj Gjokës, pasi Këshilli i Lartë Gjyqësor refuzoi të merrte një vendim ndaj saj.
