Trupi gjykues i Gjykatës së Posaçme të Shkallës së Parë i përbërë nga gjyqtaret Engjëllushe Tahiri, Rudina Palloj dhe Alma Kodraliu pranoi të hënën më 30 mars kërkesën e depozituar katër ditë më parë nga Ajola Xoxa, për revokimin ose zëvendësimin e masave të sigurimit personal të vendosura ndaj saj në shkurt të vitit të kaluar, për ndalimin e daljes jashtë shtetit dhe detyrimin për t’u paraqitur pranë policisë gjyqësore. Gjykata vendosi revokimin e këtyre masave kufizuese.
Argumentet e paraqitura nga Xoxa kanë të bëjnë me shkaqe shëndetësore, si rrjedhojë e shtatëzanisë dhe nevojave që ka për të marrë trajtim mjekësor edhe jashtë vendit. Shqetësimi për vijimin e masave të sigurimit në kushtet kur Xoxa është shtatëzënë, është ngritur më parë nga mbrojtësit e saj edhe gjatë gjykimit në themel të çështjes penale ndaj saj, bashkëshortit Erion Veliaj, e disa biznesmenëve të akuzuar për korrupsion e pastrim parash.
Erion Veliaj, i arrestuar më 10 shkurt 2025, akuzohet se, së bashku me bashkëshorten Ajola Xoxa, ndërtuan një skemë komplekse korrupsioni dhe pastrimi parash për të përfituar në mënyrë të paligjshme nga fondet e bashkisë së kryeqytetit dhe ryshfete nga biznesmenë kontraktorë të këtij institucioni vendor, duke përdorur një rrjet kompanish dhe organizatash jofitimprurëse.
Sipas SPAK, kryebashkiaku i kryeqytetit dhe bashkëshortja e tij kanë përfituar rreth 1 milion euro nga kjo skemë korruptive, para që janë përdorur kryesisht për blerje luksoze në internet nga Ajola Xoxa.
