Seanca e tretë gjyqësore e planifikuar të mërkurën më 1 prill për shqyrtimin në themel të çështjes penale për korrupsion e pastrim parash në ngarkim të kryetarit të Bashkisë Tiranë, Erion Veliaj, bashkëshortes së tij, Ajola Xoxa, ish-deputetes socialiste Klotilda Bushka dhe ndaj 15 personave të tjerë, dështoi të zhvillohej.
Shkak u bë mungesa e njërit prej avokatëve, i cili u zëvendësua nga gjykata me një avokat kryesisht. Ndërkohë, një prej prokurorëve të çështjes u shpreh se kjo ishte vijimësi e strategjisë për zvarritjen e shqyrtimit të çështjes.
Që në fillim të seancës, kryesuesja e trupit gjykues, Ëngjëllushe Tahiri konstatoi se përfaqësuesi ligjor i caktuar kryesisht për të pandehurin Fatjon Baçi, avokati Artan Simoni kishte kërkuar shtryrje të seancës dhe kishte dorëzuar një raport mjekësor. Në seancë nuk ishte i pranishëm as avokati Baçi. Kjo ishte arsyeja për të cilën u vendos shtyrja e seancës dhe për Baçin u caktua një avokate tjetër kryesisht. Ndërkohë, u urdhërua dhe shoqërimi i këtij të pandehuri për seancën tjetër.
Gjyqtarja Tahiri mori prezencën për të gjithë të pandehurit dhe avokatët e tyre. Ajo citoi një deklaratë të Veliajt, ku ai bënte me dije se ishte duke u njohur me fashikujt në ambjentet e paraburgimit ku gjendet.
Prokurori Ols Dado e cilësoi situatën si një strategji për shtyrjen e procesit. Ai tha se prej 8 muajsh nuk po arrihet të fillohet shqyrtimi i çështjes, për shkak të sjelljes së të pandehurit Erion Veliaj dhe avokatëve të tij.
Avokati i Veliajt, Plarent Ndreca konstatoi se pjesa e gjykimit të seancës paraprake nuk mund të lidhet me atë të themelit. Ai u shpreh se nuk kanë asnjë qëllim për të shtyrë seancën dhe se ai vetë ishte i pranishëm në çdo seancë. Sipas Ndrecës, megjithëse procesi duhet të zhvillohet, duhen garantuar të drejtat procedurale.
Përfaqësuesi ligjor i biznesmenit Fatmir Bektashi kërkoi që çështja ndaj tij të veçohet. Lidhur me këtë kërkesë, gjykata konstatoi se ka dhe të tjerë të pandehur që kanë kërkuar gjykimin e shkurtuar dhe se do të shprehet në momentin e duhur procedural.
Gjykata vendosi shtyrjen e seancës për më datë 3, të premten në orën 09:00.
Në seancën e parë të shqyrtimit të kësaj çështjeje në themel, gjykata vendosi të pranojë kërkesën e përsëritur të Veliajt për vendosjen në dispozicion të gjithë akteve të fashikujve hetimorë. Veliaj nuk pranoi t’i merrte aktet kur iu vendosën në dispozicion nga hetuesit e Byrosë Kombëtare të Hetimit, duke kërkuar ri-inventarizimin e tyre, por kjo kërkesë u rrëzua nga gjykata në seancën e dytë.
Erion Veliaj u arrestua më 10 shkurt 2025, pasi akuzohet se, së bashku me bashkëshorten Ajola Xoxa, ndërtuan një skemë komplekse korrupsioni dhe pastrimi parash për të përfituar në mënyrë të paligjshme nga fondet e bashkisë së kryeqytetit dhe ryshfete nga biznesmenë kontraktorë të saj, duke përdorur një rrjet kompanish dhe organizatash jofitimprurëse.
