Çështja penale në ngarkim të kryetarit të Bashkisë së Tiranës, Erion Veliaj, bashkëshortes së tij, Ajola Xoxa, ish-deputetes socialiste Klotilda Bushka dhe 15 të pandehurve të tjerë, u shty të mërkurën më 15 prill për të pestën herë. Gjyqi u shty për shkak se administrata e Burgjeve dështoi të lajmëronte Veliajn, edhe pse njoftimi i ishte dërguar nga Gjykata e Posaçme që me 3 prill.
Kryesuesja e trupit gjykues, Engjëllushe Tahiri konstatoi se shkresa për njoftimin e Veliajt është marrë nga ana e punonjësve të Drejtorisë së Përgjithshme të Burgjeve, por nuk kishte asnjë shpjegim se përse nuk ishte kryer njoftimi. Nga ana tjetër, është kryer njoftimi i të pandehurit tjetër që gjendet në të njëjtin paraburgim, Fatjon Baçi, i cili ka deklaruar se nuk do të marrë pjesë dhe do të mbrohet nga avokatja e caktuar kryesisht, Pranvera Doçi, e cila ishte e pranishme në gjykim.
Avokati i Veliajt, Plarent Ndreca dhe prokurori Altin Dumani ranë dakord se nuk mund të vijonte procesi pa realizimin e këtij momenti procedural. Dumani kërkoi nga gjykata që t’u kërkohet burgjeve të japin informacion përse nuk është kryer njoftimi.
Trupi gjykues vendosi të shtyjë seancën për më datë 27 prill, në orën 12:00, si dhe iu dërgua kërkesë Drejtorisë së Përgjithshme të Burgjeve të informojë për këtë situatë.
I pyetur nga BIRN, drejtori i Përgjithshëm i Burgjeve, Adriatik Kupi tha përmes një bisede telefonike se kishte ngritur një komision administrativ për të verifikuar se ku ka ngecur realizimi i njoftimit të Veliajt. Sipas tij, po vlerësohet gjithë zinxhiri i policisë së burgjeve që ka për detyrë të realizojë njoftimin, si dhe stafi administrativ. Kupi tha se pasi të konstatohen përgjegjësit dhe të arrihet në një konkluzion do të merren masat përkatëse dhe gjithçka do të bëhet publike.
Seanca parardhëse në këtë çështje u shty për t’i dhënë kohë avokatit të Veliajt për të realizuar një shqyrtim paraprak të dosjes.
Edhe seancat e tjera janë shtyrë për mungesë të avokatëve dhe për t’ju vendosur Veliajt në dispozicion fashikujt e dosjes hetimore. Prokurorët kanë ngritur më parë si shqetësim shtyrjen e seancave, duke e cilësuar si vijimësi të strategjisë për zvarritjen e shqyrtimit të çështjes.
Erion Veliaj u arrestua më 10 shkurt 2025, pasi akuzohet se, së bashku me bashkëshorten Ajola Xoxa, ndërtuan një skemë komplekse korrupsioni dhe pastrimi parash për të përfituar në mënyrë të paligjshme nga fondet e bashkisë së kryeqytetit dhe ryshfete nga biznesmenë kontraktorë të saj, duke përdorur një rrjet kompanish dhe organizatash jofitimprurëse.
