Një hetim i filluar tre vjet më parë nga SPAK në bashkëpunim me autoritetet franceze, holandeze dhe britanike, zbuloi veprimtarinë e një grupi të dyshuar kriminal në trafikun ndërkombëtar të kokainës, i cili po hetohet edhe për pastrimin e parave përmes një kompanie ndërtimi në zonat e lakmuara të Tiranës dhe në bregdet.
Po ashtu, SPAK njoftoi se kishte vendosur nën sekuestro pasuri të shumta të luajtshme dhe të paluajtshme si dhe disa kompani, të cilat dyshohet se janë financuar nga të ardhurat e përfituara nga trafiku i drogës.
Një nga shoqëritë e sekuestruara është Pepa Group – një kompani ndërtimi dhe përfituese e konsiderueshme e fondeve publike, e cila rezulton e lidhur me dy vëllezërit nën akuzë, Jetmir dhe Lulzim Pepa, i pari i shpallur në kërkim dhe i dyti i arrestuar.
Jetmir Pepa nuk është një emër i panjohur për forcat e rendit. Ai u shpall në kërkim në janar të vitit të kaluar pasi qëlloi me armë në një koncert në kryeqytet. Ndalimi i tij nuk është bërë i mundur, ndërkohë që është arrestuar i vëllai, Lulzim Pepa, 51 vjeç. Në pranga janë vendosur edhe dy prej të hetuarve, Anton Kola 33 vjeç dhe Florian Marku 34 vjeç.
Sipas SPAK, gjatë viteve 2019-2021, ky grup ka operuar në Amerikën Latine, në Belgjikë dhe Holandë, ku janë dokumentuar 8 episode të trafikimit të kokainës në sasi të mëdha, në total afro 6.5 ton.
Sipas Prokurorisë së Posaçme, vëllezërit Pepa kishin ndërtuar një perandori biznesi me kompaninë flamur, Pepa Group, e angazhuar në biznesin e ndërtimit, mbajtëse e koncesionit të HEC-eve dhe përfituese e fondeve publike nga disa bashki të vendit.
Pepa Group është themeluar nga Urim Pepa, vëllai i ndjerë i Jetmir dhe Lulzim Pepajt dhe aktualisht zotërohet nga trashëgimtarët e të ndjerit, por është e lidhur me dy personat e akuzuar.
SPAK deklaroi se kishte vendosur nën skuestro preventive edhe 232 pasuri të luajtshme e të paluajtshme në pronësi të drejtëpërdrejtë apo të tërthortë të personave nën hetim. Konkretisht, janë sekuestruar pasuri dhe kuota të shtatë shoqërive me seli në Tiranë; në Fierzë të Bashkisë Fushë Arrëz; në fshatin Fan Rubik; në Shëngjin dhe Ishull-Shëngjin të Lezhës.
Po ashtu, janë sekuestruar 60 pasuri të paluajtshme të llojeve tokë arë, tokë truall, hotel, poste parkimi dhe apartamente, me vendndodhje në Tiranë, Kamëz, Lezhë, Shëngjin, Sarandë dhe Himarë; 89 automjete të markave dhe llojeve të ndryshme; si dhe 72 llogari bankare që u përkasin personave të ndryshëm juridikë apo fizikë.
