Pak ditë para festës së Krishtlindjeve të vitit 2023, një grua nga zona Freiburg në Gjermani u bë viktimë e një tentative mashtrimi nga një grup i organizuar që përdorte një rrjet të kamufluar call center, duke i kërkuar të investonte një shumë prej 120 mijë eurosh. Pasi policia gjermane mësoi për këtë rast, u pengua dorëzimi i shumës së kërkuar, ndërkohë që katër ditë më vonë, përmes përgjimit të telefonit të shtëpisë së të dëmtuarës, është bërë i mundur të identifikohet numri i përdorur nga autorët.
Kjo ishte një nga qindrjamijëra telefonatat e kryera nga numri telefonik i poseduar prej grupit të organizuar të mashtrimit, që u zbuluan prej policisë gjermane që prej nisjes së përgjimit. Ndërkohë, shumica e mashtrimeve në këtë rast janë parandaluar.
Prokuroria e Posaçme, SPAK njoftoi të enjten më 16 prill përfundimin e hetimeve dhe dërgimin për gjykim të çështjes penale në ngarkim të tetë të pandehurve, pjesë e këtij grupi kriminal, të akuzuar për mashtrim me call center të shtetasve gjermanë, duke u shkaktuar atyre dëme financiare të konsiderueshme.
Të pandehurit Emiljano Sejdillari, Sokol Krasniqi, Rodrigo Guga, Eltion Logu, Tafil Dyrmishi dhe Lisjane Çulani, akuzohen për veprat penale “Mashtrim kompjuterik”, në bashkëpunimin në formën e grupit të strukturuar kriminal, “Grup i strukturuar kriminal”, dhe “Kryerje e veprave penale nga organizata kriminale dhe grup i strukturuar kriminal”, ndërsa Klejdi Nuka dhe Mateo Llozhi vetëm për “Mashtrimit kompjuterik”, në bashkëpunimin.
Sipas SPAK, autorët përdornin aplikacionin “Caller-ID-Spoofing” për të shfaqur numra të ndryshëm në telefonat e të dëmtuarve, me qëllimin për të fshehur origjinën e tyre të vërtetë. Telefonatat me palët e dëmtuara, bëheshin duke përdorur teknologjinë “voice-over-IP” përmes serverave të vendosur në Gjermani.
Megjithëse autorët kanë përdorur shërbime anonimizuese si “VPN” për të fshehur identitetin e tyre, specialistet e IT-së të Policisë Gjermane kanë indentifikuar adresat e jashtme të IP-së që tregonin lidhjet në internet dhe pajisje fundore.
Nga vlerësimi këtyre të dhënave ka rezultuar se të dëmtuarit telefonoheshin përmes shërbimit telefonik të internetit nga shtete të ndryshme, përfshirë edhe Shqipërinë.
Në njoftim bëhet me dije, se nga hetime e kontrolle të kryera prej SPAK dy vjet më parë, është zbuluar një call center në rrugën “Hamdi Sina” në Tiranë, kur janë shoqëruar gjashtë persona të dyshuar dhe janë gjetur e sekuestruar prova të shumta materiale, digjitale e dokumentare. Sipas SPAK, analiza e përbashkët e rezultateve të hetimeve të kryera në të dy vendet çoi në konkluzionin se bëhej fjalë për një grup të strukturuar kriminal me qëllim mashtrimin e shtetasve gjermanë përmes Call Center. Vlera e dëmit të shkaktuar e dokumentuar ka rezultuar 363, 501 euro, por sipas SPAK, kjo për shkak se janë parandaluar qindra tentativa të autorëve për mashtrimin e shtetasve gjermanë.
