Parlamenti turk miratoi të mërkurën një ligj që ndalon përdorimin e rrjeteve sociale për fëmijët nën 15 vjeç – duke e bërë Turqinë vendin më të fundit që ndërmerr një hap të tillë, i cili synon mbrojtjen e të rinjve nga rreziqet online.
“Një ofrues i rrjeteve sociale nuk do të lejohet të ofrojë shërbime për fëmijët që nuk kanë mbushur moshën 15 vjeç dhe do të jetë i detyruar të marrë masat e nevojshme, përfshirë verifikimin e moshës, për të garantuar që këto shërbime të mos ofrohen”, thuhet në ligjin e ri.
Ligji gjithashtu vendos kërkesa të reja për kompanitë e rrjeteve sociale për fëmijët mbi 15 vjeç.
“Ofruesi i rrjetit social do të marrë masat e nevojshme për të ofruar shërbime të diferencuara specifike për fëmijët që kanë mbushur moshën 15 vjeç. Masat e marra në këtë kuadër do të publikohen në faqen e internetit të vetë ofruesit të rrjetit social. Ofruesi i rrjetit social do të ofrojë mjete të qarta, të kuptueshme dhe të lehta për përdorim për kontrollin prindëror”, shtohet në ligjin e ri.
Megjithatë, ende nuk është e qartë se si do të zbatohet në praktikë ky ndalim.
Më herët të mërkurën, Ministri i Drejtësisë Akin Gurlek i tha parlamentit se do të paraqitet një ligj i veçantë për ta rregulluar këtë çështje.
“Është përgatitur gjithashtu një draft lidhur me rregullimin ligjor që parashikon verifikimin e identitetit përmes e-qeverisjes gjatë hyrjes në platformat e rrjeteve sociale”, tha Gurlek.
Sipas Gurlek, draftligji do të kërkojë që përdoruesit të verifikojnë identitetin dhe moshën e tyre duke përdorur sistemet e e-qeverisjes.
Gurlek kishte njoftuar më herët, më 3 prill, se qeveria kishte arritur një marrëveshje me kompanitë e rrjeteve sociale që të gjithë qytetarët turq do të duhet të verifikojnë identitetin e tyre për të përdorur llogaritë në rrjetet sociale.
Kritikët thonë se ligji i propozuar synon të rrisë kontrollin mbi rrjetet sociale dhe se heqja e anonimitetit mund të ndikojë te zërat kritikë në internet.
Detaje të mëtejshme mbi këtë sistem verifikimi dhe mënyrën se si kompanitë e rrjeteve sociale do ta integrojnë atë në produktet e tyre mbeten ende të panjohura.
Ligji i ri që ndalon rrjetet sociale për fëmijët nën 15 vjeç u propozua në një raport me titull “Kërcënimet dhe rreziqet që i presin fëmijët tanë në median digjitale”, i përgatitur nga një komision parlamentar.
Raporti kërkonte një kuadër mbikëqyrës me fokus te fëmijët, i cili trajton varësinë digjitale, bullizmin kibernetik, shfrytëzimin dhe shkeljet e privatësisë përmes ndërhyrjes së hershme, ndërgjegjësimit publik, zgjidhjeve për prindërit dhe njësive të specializuara për të drejtat e fëmijëve në nivel kombëtar dhe ndërkombëtar.
