Gjykata e Posaçme e Shkallës së Parë pranoi të enjten më 7 maj kërkesën e SPAK për kalimin për gjykim në themel të çështjes penale në ngarkim të ish-drejtuesit të Prokurorisë së Sarandës, Kledian Llaho dhe dy biznesmenëve Vasil Bakalli e Pando Papuçi. Ky i fundit ka kërkuar gjykim të shkurtuar.
Ish-prokurori Llaho dhe biznesmeni Vasil Bakalli akuzohen për veprat penale “Korrupsioni pasiv i gjyqtarit, prokurorit, apo funksionarëve të tjerë të sistemit të drejtësisë”, në bashkëpunim dhe “Ushtrim i ndikimit të paligjshëm ndaj funksionarëve publikë”, në bashkëpunim.
Ndërsa dy të pandehurit e tjerë, ish-drejtuesi i Prokurorisë Lushnjë, Çlirim Shahini që në kohën e kryerjes së veprës penale ka qenë avokat dhe biznesmeni Pando Papuçi akuzohen për “Ushtrim të ndikimit të paligjshëm ndaj funksionarëve publikë”.
Sipas SPAK, kallëzuesi, shtetasi M.A. është hetuar penalisht nga prokurori Kledian Llaho, në kuadër të një hetimi penal të Prokurorisë së Sarandës, për veprën penale të shpërdorimit të detyrës. Nga verifikimet e kryera bazuar në pretendimet e kallëzuesit, prokuroria vlerëson se është dokumentuar fakti penal se prokurori Kledian Llaho ka qenë i njëanshëm në hetimin që kishte kryer.
SPAK konstaton se kallëzuesi kishte marrë me qira një hotel në pronësi të vjehrrit të Llahos dhe i kishte njohur atij një detyrim financiar prej 1.8 milionë lekësh. Sipas prokurorisë, Llaho akuzohet se në cilësinë e prokurorit të çështjes penale në ngarkim të shtetasit M.A., i ka kërkuar që ti kthejë vjehrrit shumën 1.8 milionë lekë përmes shtetasit Vasil Bakalli, me qëllim lehtësimin e pozitës së tij procedurale.
Po ashtu, i pandehuri Pando Papuçi akuzohet se i ka dhënë 25 mijë euro avokatit të tij, Çlirim Shahini, i cili i ka premtuar se do të ushtronte ndikim të paligjshëm tek një gjyqtare.
Ish-kreu i Prokurorisë së Sarandës, Kledian Llaho i ka mohuar akuzat e ngritura ndaj tij, duke pretenduar se SPAK kishte marrë për bazë kallëzimin e një personi, i cili ishte hetuar prej tij dhe prokurorëve të tjerë për vepra penale të shpërdorimit të detyrës dhe korrupsionit. Po ashtu, i ka cilësuar si të fabrikuara pretendimet e SPAK se ai i kishte kërkuar apo marrë ryshfet me qëllim ushtrimin e ndikimit të paligjshëm te një prokurore tjetër.
