Në editorialin tuaj politik, të paraqitur gabimisht ose taktikisht si lajm, merrni përsipër të parashikoni të ardhmen e opozitës, në kundërshtim me standardet bazë të gazetarisë profesionale, të cilat kërkojnë ndarjen e qartë mes opinionit dhe lajmit, ose së paku identifikimin korrekt të zhanrit. Për dijeninë tuaj, Kryetari i Partisë Demokratike zgjidhet sipas parimit “1 anëtar, 1 votë”, përmes një procesi të hapur, transparent për mediat dhe demokratik në thelb, pasi i jep të drejtën anëtarësisë të konfirmojë ose të rrëzojë çdo kandidaturë.
Përpara se të shkruani në mënyrë tendencioze për pretendime mbi parregullsi në disa degë të PD-së, do të ishte profesionale që fillimisht të evidentonit vetë ekzistencën e këtij standardi demokratik të votës së anëtarësisë — një praktikë që mungon prej vitesh në partitë që ju zakonisht i trajtoni me shumë më tepër mirëkuptim editorial.
Procese të tilla, serioze dhe me përgjegjësi politike reale, shpesh zhvillohen edhe me një kandidat të vetëm, për shkak se pretendentë të tjerë zgjedhin të mos hyjnë në garë, nisur nga pesha dhe vështirësia objektive e kandidimit për kryetar partie.
Megjithatë, modeli “1 anëtar, 1 votë”, edhe pse ende jo dominues në Europë, po zgjerohet gradualisht dhe po adoptohet gjithnjë e më shumë nga partitë demokratike europiane si një standard legjitimiteti politik.
Në artikullin tuaj i referoheni një kritiku kronik të opozitës, i cili pretendon problematika në zgjedhjet e degëve të PD-së. Faktet janë të tjera: nga 62 degë ku janë zhvilluar zgjedhje, vetëm në një rast janë ngritur pretendime mbi listat e anëtarësisë — çështje që është kompetencë e degës përkatëse.
Në të gjitha proceset kanë marrë pjesë dy ose më shumë kandidatë, dhe në të vetmin rast me pretendime për parregullsi zgjedhjet janë ndërprerë. Si media që shpesh pozicionohet në mënyrë të hapur pranë ekstremit të majtë, ndoshta do të ishte më e dobishme të shpjegonit pse në partinë që mbështesni editorialisht nuk ekziston më vota e anëtarësisë në asnjë proces zgjedhor që prej vitit 2009.
Ervin Minarolli, Sekretar i Organizimit
