Prokuroria e Posaçme, SPAK njoftoi të martën përfundimin e hetimeve dhe dërgimin për gjykim të çështjes penle në ngarkim të 24 të pandehurve, të akuzuar si pjesë e një organizate kriminale të trafikut të kokainës me bazë në Durrës, mes të cilëve dhe Elvis Doçi, i njohur ndryshe dhe si “Visi i Pojës”.
Doçi, një prej drejtuesve të organizatës, i cili e ka marrë nofkën për shkak të lidhjes familjare me Xhevdet Troplinin, i shpëtoi arrestimit gjatë operacionit të zhvilluar një vit më parë. Gjatë një konference për shtyp më datë 21 maj 2025, ish-drejtuesi i SPAK, Altin Dumani e cilësoi këtë organizatë të trafikut të drogës, si një ndër më kryesoret e më të rrezikshmet në vend.
Tre të pandehurit Elvis Doçi, Olgert Shqevi dhe Indrit Tafili, akuzohen për veprat penale “Trafikim i narkotikëve”, “Pastrim i produkteve të veprës penale apo veprimtarisë kriminale’’, kryer në formën e veçantë të bashkëpunimit, atë të grupit strukturuar kriminal, “Grupi i strukturuar kriminal”dhe “Kryerje e veprave penale nga organizata kriminale apo grupi i strukturuar kriminal”.
Për trafik narkotikësh në bashkëpunim dhe grup i strukturuar kriminal akuzohen edhe të pandehurit Artan Sulejmani, Nexhmedin Danaj, Orges Molla, Sueld Elezi, Genti Nderjaku alias Ekil Nderjaku, Hasan Nderjaku, Altin Morina, Emri Hysenaj, Artur Shkoza, Sokol Isteri alias Tatani, Ervin Zeqiri, Gëzim Thartori, Ledio Bardhi dhe Juxhin Drazhi. Ndërsa shtatë të pandehurit Erind Lasku, Musa Korça, Alfred Hysa, Ligor Çombashi, Rando Aliu, Altin Pjetri dhe Edmond Çupi akuzohen për pastrim parash, si dhe pjesë e organizatës kriminale.
Ndryshe nga grupi i strukturuar kriminal që kërkon bashkëpunimin e të paktën tre personave disa here në kryerjen e veprave penale, aktiviteti organizatës kriminale është më e gjerë dhe përcaktohet si një veprimtari e kundërligjshme e llojit mafioz.
Hetimi është filluar në vitin 2019 nga një skuadër e përbashkët hetimore me Prokurorinë Antimafia në Bari të Italisë. Nga hetimet janë dokumentuar 30 episode të trafikut të drogës në Itali dhe 10 raste të tjera në Shqipëri dhe në vende të tjera të Evropës. Për të realizuar këtë hetim, janë përdorur edhe të dhënat nga aplikacionet SKY ECC.
Të ardhurat e përfituara nga trafiku dhe shitja e narkotikëve transportoheshin me shofera të autobusave të transportit ndërkombëtar të pasagjerëve. Kjo, me qëllim për të vështirësuar gjumimin e tyre, si edhe për të shmangur detyrimet ligjore apo shlyerjen e taksave. SPAK ka bërë me dije më parë se janë dokumentuar me pamje filimike 30 transaksione të dërgimit të parave nga Italia drejt Shqipërisë, me vlerë rreth 5 milionë euro.
Sipas SPAK, gjatë hetimit pasuror ndaj anëtarëve të kësaj organizate kriminale dhe personave të lidhur me ata, janë sekuestruar mbi 4 milionë euro në cash dhe pasuri të paluajtshme me vlerë 12 milionë euro. Konkretisht, janë sekuestruar tetë njësi në pronësi të shoqërisë “Majestic Konstruksion” sh.p.k., me sipërfaqe ndërtimore totale prej 2795 m2. Po ashtu, është sekuestruar dhe një truall me sipërfaqe 300 m2 në plazhin e Durrësit.
Gjykata ka vendosur sekuestro për gjashtë pasuri të zotëruara në bashkëpronësi nga Elvis Doçi, i njohur ndryshe si Visi i Pojës dhe nga bashkëshortja e tij. Po ashtu, janë sekuestruar dhe prona të tjera në emër të personave të lidhur me Doçin e të pandehurit e tjerë.
