Gjykata Kushtetuese vendosi të hënën që ta rikthejë çështjen e masës së sigurisë së kryebashkiakut Erion Veliaj në Gjykatë të Lartë, duke kërkuar arsyetimin e proporcionalitetit të masës së arrestit me burg në raport me statusin e tij si person i zgjedhur si dhe të pretendimit mbi cënimin e dinjitetit dhe prezumimit të pafajësisë.
Veliaj kërkoi shfuqizimin si të papajtueshëm me Kushtetutën e Republikës së Shqipërisë të dy vendimeve të Gjykatës së Posaçme, marrë në datat 9 shkurt dhe 12 shkurt të vitit të kaluar, atë të Apelit të Posaçëm të datës 13 mars 2025, si dhe të vendimit të 8 korrikut 2025 të Gjykatës së Lartë për rrëzimin e rekursit të tij.
Gjykata Kushtetuese bëri me dije të hënën se e shqyrtoi çështjen në themel vetëm në drejtim të pretendimeve për aspektin procedural dhe atë substancial të caktimit të masës së sigurimit “arresti në burg” ndaj Veliajt.
Me shumicë votash, trupa e Gjykatës Kushtetuese pranoi dy prej pretendimeve të Veliajt.
Është gjetur i bazuar pretendimi që ka të bëjë me proporcionalitetin e masës së sigurimit, të lidhur me të drejtën si person i zgjedhur. Sipas Gjykatës Kushtetuese, në këtë rast, pretendimi është gjetur i bazuar vetëm në drejtim të faktit se, Gjykata e Lartë nuk i ka dhënë përgjigje të arsyetuar këtij pretendimi të ngritur në rekurs nga ana e Veliajt. Sipas shumicës, Gjykata e Lartë duhet të arsyetojë se si mund të ndikojë masa në të drejtat kushtetuese si i zgjedhur, si dhe nëse është proporcionale me funksionin e tij si kryebashkiak.
Po ashtu, është pranuar pretendimi i Veliajt për mungesën e arsyetimit nga Gjykata e Lartë lidhur me qëndrimin në kafazin e xhamtë, që sipas tij ka sjellë cënim të dinjitetit dhe prezumimit të pafajësisë.
Gjatë komunikimit të vendimit, kryetarja e Gjykatës Kushtetuese, Fiona Papajorgji shpjegoi ndër të tjera se, Gjykata Evropiane për të Drejtat e Njeriut, GJEDNJ, në disa raste ka gjetur cënim për shkak të qëndrimit në kabinat e xhamit. Ajo vërejti se duhet të arsyetohet nga ana e Gjykatës së Lartë se përse është e nevojshme që i pandehuri të qëndrojë në kabinë xhami.
Ndërkohë, janë rrëzuar pretendimet e tjera të Veliajt për cenimin e së drejtës së mbrojtjes si dhe të cënimit të lirisë personale në drejtim të dyshimit të arsyeshëm të bazuar në prova.
Lidhur me pretendimin për mosrëndimin e pozitës në marrjen e provave të reja në Gjykatën e Posaçme të Apelit, të paraqitura nga Prokuroria e Posaçme, nuk është arritur numri prej pesë votash në vendimarrje, nga për rrjedhojë është konsideruar i rrëzuar pretendimi i Veliajt.
Në përfundim, Gjykata Kushtetuese me shumicë votash ka vendosur pranimin e pjesshëm të kërkesës së Veliajt duke shfuqizuar vendimarrjen e Kolegjit Penal të Gjykatës së Lartë si të papajtueshëm me Kushtetutën e Republikës së Shqipërisë dhe e dërgoi çështjen për rishqyrtim, po në shkallën e tretë të gjyqësorit.
Më 25 shtator 2025, Veliaj arriti të fitonte në Gjykatën Kushtetuese betejën për shkarkimin e tij, pas një procedure të iniciuar nga kryeministri Edi Rama.
Veliaj ndodhet në qeli prej 10 shkurtit 2025, kur u arrestua nga Prokuroria e Posaçme për veprat penale të korrupsionit dhe pastrimit të parave përmes një skeme që përfshin edhe bashkëshorten e tij, Ajola Xoxa. Sipas SPAK, Veliaj dhe Xoxa kanë përfituar rreth 1 milionë euro nga kjo skemë korruptive, para që janë përdorur kryesisht për stilin e jetesës dhe blerje luksoze në internet. Veliaj i ka mohuar akuzat dhe ka nisur një betejë gjyqësore kundër prokurorit të tij, Ols Dado në Gjykatën Administrative.
