Edlira Mara dhe Alba Ahmetaj, nënat e dy vajzave të mitura 5-vjeçare, kanë depozituar më 27 maj një kërkesë urgjente për urdhër mbrojtjeje pranë Policisë dhe Gjykatës së Tiranës, pas episodit të publikimit të fotografisë së dy vajzave të tyre të mitura që ndodheshin në Paradën e Krenarisë Pride 2026.
Kallëzimi drejtohet ndaj pastorit Akil Pano dhe djalit të tij, Jonathan Pano, të cilët akuzohen për “dhunë të lehtësuar nga teknologjia” dhe nxitje publike të urrejtjes përmes rrjeteve sociale.
Në përfundim të Paradës së Krenarisë, që u zhvillua në Tiranë më 23 maj 2026, pastori dhe djali i tij, si edhe një dyzinë mediash online dhe llogarish në rrjetet sociale, shpërndanë një imazh ku identifikoheshin fytyrat e dy vajzave të mitura.
Shpërndarja e imazhit u pasua me një debat të ashpër publik, ku nuk munguan gjuha e urrejtjes, stigmatizimi dhe ofendimet e shumta.
Për këtë arsye, nënat e vajzave të mitura bënë kallëzimin dhe u shprehën se ky akt, përveçse ka ndikuar në mirëqenien e tyre psikologjike, ka rrezikuar edhe sigurinë e vajzave të tyre.
“Këto publikime patën si pasojë një valë komentesh kërcënuese, si edhe frikë për sigurinë e jetës sonë dhe të fëmijëve,” shkruajnë nënat e fëmijëve në deklaratën e tyre.
Ato shtojnë se jeta e tyre është paralizuar dhe se prej dy ditësh nuk dalin nga shtëpia, ndërsa fëmijët nuk shkojnë në kopsht nga frika e sulmeve.
Nëpërmjet këtij urdhri mbrojtjeje, nënat e vajzave kërkojnë ruajtjen e distancës fizike nga banesa apo kopshti i vajzave, fshirjen e postimeve nga rrjetet sociale, si dhe ndalimin e përmendjes së emrave apo publikimit të fotove të tyre dhe të vajzave.
