Edi Rama e lidhi fatin e këtij investimi turistik me fatin e detyrës së tij si kryeministër duke e mbrojtur si ‘vizion’ për të cilin ishte votuar, ndërsa protestat dhe kundërshtitë ndaj projektit I lidhi me ‘mediat greke’ dhe teori konspirative për shitje tek izraelitët.
Rama sugjeroi se pas kundërshtimit ndaj projektit qëndronin interesa politike dhe ekonomike. Ai foli për “forca të brendshme” që kërkojnë “kthimin në komunizëm” ose nxisin “urrejtjen ndaj shteteve të tjera”, si dhe për “forca të jashtme” që nuk e duan investimin, duke e paraqitur debatin për Zvërnecin si pjesë të një përplasjeje më të gjerë kundër zhvillimit të projektit.
“Si mund të jenë gazetat e Greqisë aleatët tuaj në mbrojtjen e mjedisit të Shqipërisë? Gazetat greke që janë mbushur sot të gjitha me kauzën tuaj. Ka diçka këtu që nuk shkon?”- tha ndër të tjera Rama, referuar qëndrimeve të shtetit fqinj pasi një protestues i dhunuar nga rojet private të tokës së rrethuar kishte edhe shtetësinë greke.
Duke folur me ton revoltues Rama artikuloi gjithashtu teoritë konspirative për shitje të Zvërnecit tek investitorë izraelitë duke sulmuar për krijimin e këtyre teorive grupe myslimane ndërsa e mbrojti ndërhyrjen në zonë me logon e kompanisë investuese.
“…Jo nga Izraeli, por nga Katari, që nuk besoj se mund të konsiderohet nga ata që i thonë vetes muslimanë, por vetëm mysliman nuk janë, vetëm allah dhe kuran nuk kanë, sepse bëjnë çdo ditë krimin e ndaluar nga kurani, për të helmuar njerëzit me shpifje”- tha ai duke iu referuar vetëm njërës nga kompanitë që është përfshirë në këtë investim dhe që zotërohet nga dy vëllezër miliarderë me bazë në Katar.
Qëndrimet e Ramës vijnë në një kohë kur Prokuroria e Posaçme, SPAK, ka konfirmuar nisjen e hetimeve mbi mënyrën e përfitimit të tokave në zonën e mbrojtur të Zvërnecit dhe procedurat e ndjekura për projektin turistik të lidhur me kompanitë e investitorit amerikan Jared Kushner.
Hetimi i SPAK pritet të shqyrtojë si procedurat e transferimit të pronësisë së tokave ashtu edhe ligjshmërinë e vendimmarrjeve institucionale që kanë shoqëruar projektin.
Një investigim i BIRN i publikuar të premten e kaluar, gjeti se pas projektit për ndërtimin e rezorteve, që është prezantuar publikisht si një ide e dhëndrit të presidentit të SHBA-së, Jared Kushner, fshihet një rrjet vendor i dyshimtë individësh dhe kompanish. Aty përfshihen: një biznesmen i akuzuar për lidhje me mafian italiane, një ish-gjyqtar i dorëhequr për shkak të procesit të vetingut, vajza e një avokati të akuzuar për falsifikim, kompania e një biznesmeni të vrarë dhe individë të lidhur me një prej oligarkëve më të mëdhenj në Shqipëri, Shefqet Kastrati.
Ndërkohë, toka ku pritet të zhvillohet projekti është prej vitesh objekt konfliktesh gjyqësore të pazgjidhura, si dhe konsiderohet nga ekspertë të mjedisit si një nga zonat me më shumë biodiversitet në vend dhe ruan një sërë pasurish natyrore jo vetëm të Shqipërisë, por edhe të Europës.
Projekti turistik në Zvërnec ka shkaktuar kundërshtime të vazhdueshme nga organizatat mjedisore, aktivistët dhe një pjesë e banorëve të zonës, të cilët argumentojnë se ndërhyrja rrezikon ekosistemin e lagunës së Nartës dhe integritetin e një prej zonave më të rëndësishme të mbrojtura në bregdetin shqiptar.
Kryeministri e mbrojti investimin si një vizion I tij për turizëm elitar dhe si në përputhje me ligjin e Zonave të Mbrojtura, të cilin mazhoranca që ai drejton e amendoi dy vitë më parë për t’I hapur udhën ndërtimeve turistike dhe luksoze në toka që deri dje konsideroheshin të ndaluara për ndërtime masive.
Megjithatë, gjatë fjalës së tij, kryeministri pranoi se projekti nuk ka ende një projekt arkitektonik të miratuar dhe as një studim mjedisor të përfunduar.
Ai tha se aplikimi i paraqitur në vitin 2024 ishte refuzuar nga Këshilli Kombëtar i Territorit, i cili kishte kërkuar uljen e intensitetit të ndërtimit dhe masa shtesë për mbrojtjen e lagunës.
“Sot nuk ka një projekt arkitektonik të miratuar, ai nuk ekziston”, deklaroi Rama, duke shtuar se investitorët kanë angazhuar studio ndërkombëtare arkitekturore dhe ekspertë mjedisorë për përgatitjen e projektit të ri dhe të studimit të ndikimit në mjedis.
