Genc Ruli, ish-ministri i Ekonomisë i qeverisë “Berisha” gjatë periudhës 2005-2009, u pyet të hënën, më 8 qershor, në cilësinë e dëshmitarit, në kuadër të procesit penal ndaj kryetarit të PD-së, Sali Berisha, dhëndrit të tij, Jamarbër Malltezi dhe disa të pandehurve të tjerë, lidhur me privatizimin e ambienteve të ish-klubit sportiv “Partizani”.
Hetimi ndaj Berishës dhe të pandehurve të tjerë u përmbyll në tetor të vitit 2024, kur SPAK e dërgoi në gjykatë për shqyrtim gjyqësor, me akuzat për korrupsion dhe pastrim parash. Sipas prokurorisë, Malltezi përfitoi të ardhura nga një biznes ndërtimi falë vendimeve të qeverisë së kryesuar nga vjehrri i tij. Berisha dhe Malltezi i kanë kundërshtuar akuzat, duke e cilësuar çështjen politike dhe të orkestruar nga kryeministri Edi Rama, i cili gjithashtu është në listën e dëshmitarëve.
Në përgjigje të pyetjeve të prokurores Enkeleda Millonai, Ruli shpjegoi se ka qenë ministër i Ekonomisë gjatë periudhës 2005-2009. Sipas Rulit, Ministria e Ekonomisë (ME) është përfaqësuese e shtetit në cilësinë e pronarit civil. Ai vërejti se asnjë kontratë që ka të bëjë me pronat shtetërore nuk mund të nënshkruhet përveçse nga ME, që ka kompetencë për mbikëqyrjen e procedurave të privatizimit.
Lidhur me privatizimin e objekteve shtetërore, Ruli solli në vëmendje se kishte qenë në programin e PD-së gjatë fushatës së vitit 2005 që të mundësohej që pronarët e vjetër të fitonin të drejtat mbi pronat e tyre. Ai tha se, me ardhjen në pushtet, e kishin edhe pjesë të programit të qeverisë përfundimin e kthimit të pronave ish-pronarëve, proces që nuk ishte realizuar dot prej vitit 1991 e në vijim.
Ruli deklaroi se privatizimi për ambientet e sportklubit “Partizani” kishte filluar para ardhjes në pushtet të PD-së, por pa u konsideruar interesat e pronarëve të tokës.
Sipas Rulit, që në fillim të qeverisjes në vitin 2005, u kishte kërkuar gjithë ministrive dhe institucioneve që të dorëzonin inventarin e pronave shtetërore që administronin, si dhe dokumentet dhe pretendimet e privatëve mbi to, që të nisnin procesin e kthimit të pronave. Ai tha se i pari i kishte kthyer përgjigje ministri i Mbrojtjes, Fatmir Mediu.
Në vijim, Ruli shpjegoi se kur ishte bërë ministër kishte pasur interes nga ana e pronarëve të tokës, përfaqësues të fisit Begeja dhe Bektashi, si dhe nga pronarët e tjerë të asaj toke, për të cilët tha se nuk u kujtonte emrat.
“Ju kam thënë pronarëve se nuk do mund të ecim shpejt për shkak të komplikimeve procedurale”, tha ai.
Lidhur me vonesën prej dy vitesh të miratimit të procedurës së privatizimit të objekteve të sportklubit “Partizani”, Ruli tha se kjo situatë ndodhte për shkak të procedurave të asaj kohe, që kërkonin vjet për t’u realizuar.
Ruli deklaroi se i merrnin të mirëqena verifikimet e kryera nga ministritë apo institucionet që zotëronin objektet që do të privatizoheshin nga pronarët e tokave. Kur u pyet nëse pronat kishin qenë të regjistruara në emër të shtetit, Ruli vërejti se edhe sot fare pak janë të regjistruara. “Mund të ketë qenë një pjesë e vogël me hipotekë”, tha ai.
Millonai e pyeti nëse kishte bërë verifikime nëse pronat kishin qenë të regjistruara, por Ruli tha se ai kishte qenë ministri dhe se verifikimet i kryenin nëpunësit, për të cilët shprehu besimin se kishin qenë të mirë e profesionistë.
“Në çdo rast duhej të vinte propozimi nga ministria që e kishte pronën e që gjykonte se duhej privatizuar. Ajo pronë ishte denigruar e shkatërruar dhe donim ta përshpejtonim që të ruhej dhe ajo pak vlerë që kishte”, tha Ruli.
Ai theksoi se ishin të vonuara ndryshimet në legjislacion që u dhanë mundësinë pronarëve të kryenin privatizimet. “Duhej të ishte ndryshuar më parë. Them që është bërë me vonesë”, pohoi ai.
Po ashtu, Ruli tha se me vonesë ishin kryer edhe rregullimet ligjore e nënligjore, që mundësonin privatizimin e objekteve shtetërore përmes bonove të privatizimit. Sipas tij, nga bonot e privatizimit përfituan përveç ish-pronarëve, edhe qytetarët e zakonshëm, pasi u konsideruan si kontribues në pronën publike.
“Ne kemi pasur premtim elektoral dhe qeveritar se do kthenim bonot e privatizimit e se prioritet do kishin ish-pronarët”, tha Ruli.
Prokurorja Millonai e pyeti Rulin edhe për një propozim të kryer prej tij, që Agjencia e Kthimit dhe Kompensimit të Pronave (AKKP), të ishte në varësi të Kryeministrit. Millonai solli në vëmendje se ish-ministri i Brendshëm i ndjerë, Sokol Olldashi kishte propozuar të ishte në varësi të Ministrisë së Drejtësisë (MD). Kur u pyet se përse kishte propozuar të ishte nën varësinë e Kryeministrit, Ruli tha se kishte vlerësuar që të ishte strukturë më e centralizuar.
Avokatja Klodiana Gjyzari e pyeti Rulin nëse ishte takuar me të pandehurin Malltezi për këtë privatizim, ose nëse Berisha e kishte shtyrë për propozimin e VKM-së apo nëse ishte ushtruar presion ndaj nëpunësve në Ministrinë e Ekonomisë. “Në xhaminë ku jam unë Hoxhë, nuk urdhëron dikush tjetër”, tha Ruli.
Gjatë shpjegimeve të tij, Ruli konstatoi se për privatizimin e sportklubit “Partizani” kishte pasur iniciativa edhe nga ministrat e qeverisë “Nano”, Angjeli, Klosi e Majko, para vitit 2005. Sipas tij, procedura ka filluar që në vitin 2000 nga ministri i Mbrojtjes, Ismail Lleshi.
Prokurorja Millonai e pyeti sërish Rulin, se përse gjithë procesi i privatizimit zgjati katër vjet. Ai shpjegoi se procedura zgjaste, pasi përgatitej edhe legjislacioni. Ruli nënvizoi se ndryshimet ligjore janë bërë për proceset e privatizimit në përgjithësi dhe jo në veçanti për këtë objekt gjykimi. Sipas tij, falë këtyre ndryshimeve proceset e mëvonshme të privatizimit ecën më mirë.
Në përfundim, Ruli tha se para se të largohej nga pozicioni i ministrit të Ekonomisë, kishte lënë në tryezë për pasardhësin 59 dosje për privatizimin e pronave të administruara nga shteti, nga ish-pronarët.
Gjatë seancës të hënën u pyet si dëshmitare edhe juristja dhe drejtorja e sportit pranë Ministrisë së Kulturës dhe Sportit, Violeta Shqevi. Ajo shpjegoi se kishte qenë edhe sportiste dhe kur kishte mbajtur pozicionin e drejtores ishte angazhuar në hartimin e strategjisë për sportin, që të mundësonte zhvillimin e sportit elitar, masiv e gjithëpërfshirës. Ajo tha se ishin ngritur shqetësime nga drejtori i sportklubit “Partizani” për leje ndërtimi brenda kompleksit dhe uzurpim të godinave.
Ajo tha se këto shqetësime i kishte drejtuar tek eprorët përmes memove, ku ndër të tjera ishte kërkuar rritja e infrastrukturës për sportin, si dhe nëse do të kishte privatizime të objekteve të klubeve të ndryshme, atëherë të zbatohej praktika rumune, që të zëvendësoheshin ambientet me vende të tjera. Ajo deklaroi se kishte qenë gjithmonë e lirë për të përcjellë mendimin e saj, sipas kompetencave dhe detyrave që kishte.
Mbrojtësit e të pandehurve e pyetën dëshmitaren nëse kishte dijeni lidhur me vendimmarrje e procedura të kryera nga ministrat e qeverisë socialiste para vitit 2005 për privatizimin e sportklubit “Partizani”, si dhe një vendim i KRT-së së Bashkisë Tiranë i vitit 2004 të nënshkruar nga Edi Rama për ndryshimin e destinacionit nga zonë sportive në banimi, por Shqevi tha se nuk i ishin vendosur në dispozicion gjithë këto akte.
Në seancën e ardhshme që u caktua të zhvillohet më datë 22 qershor, në orën 10:00, do të thirren të dëshmojnë Ylli Pango, Tedis Lubonja, Altin Ceni dhe Paro Laçi.
