Gjatë seancës së tretë përgatitore të zhvilluar të premten më 19 qershor në Gjykatën Administrative, nuk u arrit një përfundim mbi legjitimitetin e kryebashkiakut Erion Veliaj ndaj padisë së prokurorit të tij, Ols Dado.
Veliaj i kërkon Gjykatës Administrative të Shkallës së Parë zhbërjen e dekretit të Presidentit për emërimin e prokurorit Ols Dado, duke e konsideruar atë të paligjshëm. Përfaqësuesi ligjor i Dados dhe Këshilli i Lartë i Prokurorisë, KLP, kanë parashtruar se Veliaj nuk legjitimohet për të ngritur një padi të tillë.
Mbrojtësi i Veliajt, avokati Plarent Ndreca në fillim të fjalës së tij ngriti pretendime mbi moslejimin e transmetimit të seancës, si dhe për pengimin e një pjese të publikut për të qenë të pranishëm në sallën 1 të gjykatës, ku në fakt gjendeshin vetëm dy radhë me karrige. Ai cilësoi të pabazuar një udhëzim të Këshillit të Lartë Gjyqësor për mënyrën e administrimit të seancave gjyqësore, ndërkohë që gjyqtari Hazbi Balliu i kërkoi që të ishte më konçiz dhe të kalonte në qëndrimin ndaj parashtruimeve të KLP-së.
Ndreca vijoi të ankohet gjatë dhe ngriti si shqetësim praninë e një punonjësi të Policisë së Shtetit në sallë që nuk lejonte të hynin persona të tjerë, pasi nuk kishte hapësirë të mjaftueshme.
Ai e akuzoi KLP-në se në këtë rast është bërë palë me paligjshmërinë. “Kush ka më shumë legjitimitet se Erion Veliaj, i cili është arrestuar nga një prokuror i emëruar në mënyrë të paligjshme”, tha Ndreca ndër të tjera dhe vazhdoi të parashtronte rrethanat e objektit të padisë, që ka të bëjë me mënyrën e emërimit të prokurorit Ols Dado.
Gjyqtari Balliu kërkoi në mënyrë të ëprsëritur që diskutimi të përqëndrohej në elementët proceduralë, por veç Ndrecës, edhe kryebashkiaku Erion Veliaj, i pranishëm në seancë, foli gjatë lidhur me objektin e padisë. “Unë jam prej 500 ditësh në burg nga një prokuror me pesa”, tha ai.
Pasi Veliaj e Ndreca përsëritën qëndrimet e tyre kundër emërimit të Dados, gjyqtari Balliu konstatoi se në gjykatë ishte depozituar një kërkesë për ndërhyrës kryesor në këtë çështje nga ana e një shoqate të quajtur “Asociacioni Kombëtar i Medias dhe i Drejtësisë”. Shoqata u përfaqësua në seancë edhe nga avokati Ervin Karanxha, i cili deklaroi se kjo shoqatë ka si qëllim mbrojtjen e interesit publik dhe për rrjedhojë ka interes të drejtëpërdrejtë për mënyrën e përzgjedhjes së një prokurori.
Po ashtu, shoqata ka depozituar kërkesë padi për pavlefshmërinë absolute të dekretit të Presidentit për emërimin e Dados. Sipas Karanxhës, aktet individuale kanë sjellë pasoja të përgjithshme. Ai kërkoi që të pyeten ish-presidenti Bamir topi dhe ish-prokurorja e Përgjithshme, Ina Rama.
Po ashtu, Karanxha solli në vëmendje një vendim të Gjykatës Evropiane për Të drejtat e Njeriut, që sipas tij, ka gjetur mangësi në hetimin e 21 janarit, ku një nga prokurorët që e ka hetuar ka qenë Ols Dado. Sipas tij, kjo çështje ka interest ë lartë publik.
Avokati Plarent Ndreca kërkoi kohë për t’u njohur me kërkesat e shoqatës “Asociacioni Kombëtar i Medias dhe i Drejtësisë”. Gjyqtari Balliu sygjeroi që seanca të shtyhej me një orë sat ë njiheshin palët, por Ndreca dhe Veliaj këmbëngulën për më shumë kohë.
Ndërsa avokati i prokurorit Dado konstatoi se në këtë rast, kanë të drejtë për kryerjen e padisë vetëm ata që kanë qenë pjesë e asaj procedure. Sipas tij, shoqata nuk pretendon shkeljen e një të drejte të tyre.
Përfaqësuesja e presidencës deklaroi se nuk ishte në gjendje të shprehej në këtë seancë. Për rrjedhojë, gjyqtari Hazbi Balliu vendosi shtyrjen e seancës për më datë 3 korrik, në orën 13:00.
Veliaj ndodhet në qeli prej 10 shkurtit 2025, kur u arrestua nga Prokuroria e Posaçme për veprat penale të korrupsionit dhe pastrimit të parave përmes një skeme që përfshin edhe bashkëshorten e tij, Ajola Xoxa. Sipas SPAK, Veliaj dhe Xoxa kanë përfituar rreth 1 milionë euro nga kjo skemë korruptive, para që janë përdorur kryesisht për stilin e jetesës dhe blerje luksoze në internet.
Veliaj i ka mohuar akuzat dhe ka nisur një betejë gjyqësore kundër prokurorit të çështjes ndaj tij në Gjykatën Administrative.
