Në një mesazh të publikuar në rrjetet sociale, Spiropali tha se Shqipëria që qytetarët dëshirojnë të ndërtojnë duhet të jetë “më e hapur, më e drejtë, më meritokratike dhe më europiane”, por shtoi se arritja e këtij objektivi kërkon transformimin e vetë Partisë Socialiste.
“Partisë Socialiste i duhet të gjejë forcat, të mbledhë mendjen, të vetëpastrohet, të bëhet më dinamike, më demokratike, më kompakte, për të mbetur gjithmonë e re, gjithmonë e pastër, pa smërçe, pa ndryshqe, pa pehlivanllëqe”, shkroi Spiropali.
Deklarata vjen në një moment kur Partia Socialiste po përballet me presion në rritje për shkak të hetimeve të Prokurorisë së Posaçme ndaj një sërë zyrtarësh të lartë, si dhe përballë valës së protestave qytetare të mbiquajtura “Revolucioni i Flamingove”.
Megjithëse Spiropali nuk specifikoi se çfarë nënkupton konkretisht “Marrëveshja e Re”, përdorimi i termave si “vetëpastrim”, “meritokraci” dhe “demokratizim” sugjeron një përpjekje për ta paraqitur partinë në një fazë reflektimi dhe reformimi të brendshëm.
Mesazhi merr peshë të veçantë pasi vjen nga një prej bashkëpunëtoreve më të afërta të kryeministrit Edi Rama ndër vite. Ai pason gjithashtu largimin e deputetes Marjana Koçeku nga grupi parlamentar socialist, një vendim që ka nxitur diskutime mbi klimën e brendshme në partinë në pushtet dhe nevojën për rinovim politik.
“Ta bëjmë Marrëveshjen e Re të madhe, të thellë, të vërtetë”, shkroi Spiropali, duke argumentuar se përmirësimi i vendit kalon përmes përmirësimit të vetë forcës politike që e qeveris atë.
Deklarata nuk shoqërohej me propozime konkrete për reforma, por ajo pritet të ushqejë debatet mbi gjendjen e Partisë Socialiste dhe sfidat me të cilat përballet qeveria e Edi Ramës pas më shumë se një dekade në pushtet.
