Këshilli i Lartë Gjyqësor, KLGJ vendosi të mërkurën të shtyjë për të tretën herë shqyrtimin e projektvendimeve për verifikimet e kritereve të kandidimit për kryetarët e gjykatave, pasi anëtarët e Këshillit shfaqën qëndrime të ndryshme për mënyrën se si kuptonin legjislacionin.
Diskutimet u zhvilluan më së shumti rreth përcaktimeve të parashikuara në shkronjat (b), (i) dhe (ii) të pikës 6 të nenit 47 “Kriteret minimale të përvojës profesionale për ngritjen në detyrë”, në ligjin “Për statusin e gjyqtarëve dhe prokurorëve në Republikën e Shqipërisë”.
Sipas këtyre përcaktimeve ligjore, për ngritjen në detyrë të magjistratëve në shkallë të parë ose të dytë, ndër të tjera duhet që një kandidat të përmbushë treguesit e kërkuar për aftësi organizative dhe drejtuese, të tilla si përvoja si zëvendëskryetar, kryetar i një seksioni ose magjistrat për çështjet e shtypit; përvoja në pozicione drejtuese në administratën publike ose të drejtësisë, ose përvoja si anëtar i Këshillit, që ka përfunduar të paktën në tre vjet më parë.
Disa prej anëtarëve u shprehën se ishin të paqartë nëse kërkoheshin si kriter aftësitë organizative dhe drejtuese së bashku, apo mjaftonte vetëm një prej tyre. Një prej anëtarëve, u përpoq të bënte të qartë përcaktimet ligjore duke argumentuar edhe mbi bazën e gramatikës së gjuhës shqipe. Po ashtu, një tjetër anëtar anëtar theksoi se në ligj ishte e shkruar e ‘zeza mbi të bardhë’.
Megjithatë, në përfundim u pranua propozimi i një prej anëtarëve, i cili kërkoi që, përpara se të përcaktohen kriteret për ngritjen në detyrë në këtë proces, të merret opinioni i projektit “JUSTAL”, i cili sipas tij ka dhënë kontribut në hartimin e legjislacionit.
Përveç mbledhjes së të mërkurës, shqyrtimi i këtyre projektvendimeve është shtyrë dhe në mbledhjet plenare të datave 24 dhe 16 qershor.
Kandidatët në garë janë: gjyqtarja Ermira Dedja për pozicionin e kryetares në Gjykatën e Shkallës së Parë të Juridiksionit të Përgjithshëm Shkodër; për pozicionin e kryetarit të Gjykatës së Posaçmet ë Apelit kandidojnë gjyqtarët Dhimitër Lara dhe Engert Pëllumbi; Erjon Çela ka kandiduar për pozicionin e kryetarit të Gjykatës së Posaçme të Shkallës së Parë dhe gjyqtari Ramiz Lala për pozicionin e kryetarit në Gjykatën Administrative.
