Planifikimi i dasmës së shumëpritur të nuses ballkanase mbërrin te momenti i veçantë i tortës. E mëdyshur mes pamjes apo shijes, ajo i futet zbulimit të traditës së tortave të dasmave për të kuptuar nëse rregullat duhen ndjekur apo thyer në ditën speciale të kurorëzimit të dashurisë.
Disa vite më parë, po organizoja dasmën e një miku. Ai mi la të gjitha në dorë dhe më pëlqeu shumë. Zbulova se një nga gjërat që ishte më e lehtë për t’u organizuar ishte torta e dasmës. Por jo kësaj here!
Mesa duket, tradita e tortës së dasmës e ka origjinën nga Roma e Lashtë, megjithëse ata përdornin bukë në vend të tortës. Por, a e dini përse tortat e dasmave janë aq të larta? Tradita në Anglinë Mesjetare ishte që të bëhej një grumbull tortash sa më i lartë të ishte e mundur dhe pastaj nusja dhe dhëndrin putheshin mbi to. Nëse ia dilnin, atëherë do të kishin një jetë të begatë, kështu besohej.
E vërtetë ose jo, shekujt dhe zakonet janë ndërthurur duke e kthyer të gjithë tortën e dasmës në një pjesë të veçantë të mbrëmjes.
Duhet të kesh një tortë të bukur, të mbuluar në mënyrë të mrekullueshme për të impresionuar të tjerët dhe për t’i dhënë atyre një mundësi të mbushin celularët me foto të tuat me tortën. Supozohet ta presësh tortën duke e mbajtur thikën së bashku me partnerin dhe më pas ha copën e parë të saj.
Jo vetëm kaq, në fakt duhet të ushqeni njëri-tjetrin dhe ndërsa e bëni këtë të përpiqesh ta lyesh sa më shumë në fytyrën e personit tjetër. Të gjithë shkrepin celularët dhe kamerat, ti buzëqesh, ngjan qesharake, ha tortën dhe muzika fillon sërish.
Ajo që doja të thosha është: nuk është e rëndësishme se çfarë shije ka; pamja është më e rëndësishmja.
Ndaj kur po organizoja dasmën e mikut dhe po kërkoja për torta, gjeta një foto të një tortë që mendova se dukej fantastike. Ata nuk e pëlqyen, por unë e ruajta foton. Tani, ndërsa mendova rreth dasmës sime, mu kujtua dhe fillova të kërkoja dokumentet në kompjuter për ta gjetur.
Një tortë e bukur dhe e sheshtë sa për të ftuarit që do të qeras me tortën e dasmës – por doja që pjesa e sipërme të ishte diçka e pazakontë, diçka unike, e bërë për ne; diçka që do ta mbaj përgjithnjë që të më kujtojë atë ditë.
E gjitha kjo ndodhi tre muaj më parë. Vendosa të kontaktoja zonjën që bëri tortën për dasmën e mikut. I çova foton dhe i shpjegova pjesën e sipërme. Pa problem!
Kini parasysh, se kur një ballkanas ju thotë “pa problem” është koha të filloni të shqetësoheni, këtë bëra edhe unë. I shpjegova më shumë detaje dhe lashë hapësirë për konstatime. Pa problem! Kur thuajse ishte mbaruar pjesa e sipërme, e pyeta për lartësinë e bazës dhe ia shpjegova sërish. Pa problem! Kur e mora pjesën e sipërme dhe ia çova pastiçerisë: problem!
“Nuk e imagjinova kështu. Nuk e bëj dot këtë. Kam frikë se nuk ta zbatoj dot porosinë,” thotë ajo dhjetë ditë përpara dasmës.
“Pa problem,” i thashë.
Tortat e dasmës janë të bukura. Ato zakonisht kanë disa kate dhe diçka lart. njerëzit që i bëjnë tortat e shohin veten si artistë. Unë i shoh ata si artistë gjithashtu; kam parë torta të formave dhe dekorimeve të tilla që të bëjnë të mos duash t’i presësh për t’ia prishur bukurinë.
Janë të bukura dhe për të qenë e sinqertë, ky është i vetmi qëllim. Është shtresa e sheqerit që i bën të gjithë tortat të duken të bukura në çfarë ngjyre të duash. Shtresa e sheqerit është e vetmja arsye përse nuk bëjmë torta të vërteta siç bënte ime më, kur duam që ajo të duket e bukur për një rast. Nuk ka më torta me arra dhe bajame përsipër të përgatitura me krem të gatuar ngadalë bërë nga çokollata, vezët dhe gjalpi – të gjitha të shijshme dhe të rënda.
Pjesa e brendshme është zakonisht thjesht biskotë dhe pak krem gjalpi. Biskota ofron fortësi dhe kremi i gjalpit është i mirë që të ngjitet shtresa e sheqerit te torta. Në fakt, kjo është pamja e brendshme e një torte dasme dhe këtë shije ka, vetëm e vetëm që torta t’i shërbejë synimit që të ketë pamje të bukur, të fotografohet dhe të ndahet për t’iu përlyer në fytyrë tjetrit.
Klikoni këtu për të lexuar: Dasma ime ballkanase prej të rriture (1), Dasma ime ballkanase prej të rriture (2), Dasma ime ballkanase prej të rriture (3); Dasma ime ballkanase prej të rriture (4), Dasma ime ballkanase prej të rriture (5), Dasma ime ballkanase prej të rriture (6), Dasma ime ballkanase prej të rriture (7), Dasma ime ballkanase prej të rriture (8), Dasma ime ballkanase prej të rriture (9), Dasma ime ballkanase prej të rriture (10), Dasma ime ballkanase prej të rriture (11), Dasma ime ballkanase prej të rriture (12).
