Gjykata e Lezhës vendosi të kalojë për gjykim çështjen ndaj dy mjekëve të Spitalit Rajonal. Mjekët akuzohen për “mjekim të pakujdesshëm” me pasojë vdekjen e një 3 vjeçari.
Dy mjek të Spitalit Rajonal të Lezhës u morën të pandehur nga gjykata me akuzën e mjekimit të pakujdesshëm, pasi dyshohet se nuk i kanë dhënë ndihmën e duhur mjekësore një fëmije 3-vjeçar, i cili humbi jetën prej një viroze në 17-janar të vitit 2017-të.
Mjekët P.L dhe K.K u paditën në prokurori nga familjaret e fëmijës. Prokuroria e Lezhës, pas marrjes së provave dhe dëshmive për çështjen e çoi atë për gjykim në gjykatën e rrethit gjyqësor Lezhë. Akuza pretendon se mjekët kanë konsumuar veprën penale të “mjekimit të pakujdesshëm”. Dy mjekët i kanë mohuar akuzat.
Megjithatë sëfundmi Gjykata e Lezhës pranoi gjatë një seance paraprake kërkesën e prokurorisë, duke vendosur që çështja të kalojë për gjykim.
Në seancën gjyqësore për dërgimin e çështjes për gjykim avokatët e dy mjekëve kanë kërkuar pushimin e procedimit penal ndaj klientëve të tyre, pasi sipas tyre në dosjen hetimore gjithçka është në kuadrin e dyshimeve dhe akuzat nuk janë të faktuara. Por kërkesa e tyre nuk është pranuar nga gjyqtari i çështjes.
Sipas dosjes hetimore fëmija është paraqitur në spitalin e Lezhës me shenja klinike si: “Mos reagim ndaj dhimbjes, hipotoni muskulare, gjendje prej kome, vështirësi në frymëmarrje dhe frymëmarrje të zhurmshme”. Për këto shqetësime fëmija ka marr mjekim në spital dhe më pas është dërguar në shtëpi.
Por një ditë pasi është përcjellë për në shtëpi gjendja e tij shëndetësore është rënduar dhe ai është paraqitur sërish në Spitalin e Lezhës. Ai ka qëndruar disa orë aty dhe mjekët e kanë dërguar drejt Tiranës. Ai vdiq në Tiranë një ditë më vonë.