Lajm18 May 2020

Opozita dhe aktivistët thërrasin protestë, ndërsa Rama tenton të shfryjë zemërimin

Aktivistët dhe partitë politike në opozitë bënë thirrje për protesta të reja kundër kryeministrit Edi Rama, një ditë pasi ky i fundit shembi Teatrin Kombëtar. Polica shtoi kontrollet dhe postoblloqet nëpër rrugë ndërsa njoftoi arrestimin e shtatë protestuesve të së dielës.

Autor: Gjergj Erebara BIRN Tiranë
Printo

Teatri i shembur. Foto e datës 18 Maj 2020.

Një ekskavator po hiqte pirgun me inerte ndërsa pankartat që ftojnë qytetarët në teatër vijojnë të jenë ironikisht të paprekura në pedonalet e Tiranës mëngjesin e së hënës, një ditë pasi Kryeministri Edi Rama shkatërroi ndërtesat binjake të Luftës së Dytë Botërore, një çështje që ndau qytetarët për më shumë se dy vjet.

Policia e mban ende të rrethuar zonën në të cilën nuk kishte më protestues. Kalimtarët ndalonin për të parë rrënojat, disa nxirrnin celularët për të kapur atë që kritikët e quajnë shkatërrim të një pjese tjetër të historisë së qytetit.

Pavarësisht se njëri prej tyre nuk e preku fare gardhin rrethues, një polic i moshuar i kërkoi të tërhiqej në trotuar ndërsa një kalimtar tjetër iu drejtua policëve me ton të butë: “A nuk ju vjen turp që po mbroni një bandë”? Të kapur pa vëmendje, policët nuk u përgjigjën.

Aleanca për Mbrojtjen e Teatrit bëri thirrje për protestë në orën 16.30 të së hënës kundër asaj që ata e quajnë “Diktaturë”, ndërkohë që partnerët perëndimorë të Shqipërisë bënë thirrje për qetësi.

Kryeministri Edi Rama dhe kryebashkiaku i Tiranës Erion Veliaj dhanë një mesazh të dyzuar dhune dhe ngushëllimi për protestuesit pasditen e së dielës. Por ndërsa Rama dhe Veliaj shprehnin dhembshuri për vuajtjet e protestuesve, shumë prej të cilëve e panë shembjen e Teatrit me lot në sy, policia ndërhyri dhunshëm kundër një grupi protestuesish.

“Unë dua t’i zgjas dorën çdokujt që nuk ishte dakord me ne në këtë betejë,” deklaroi Veliaj, duke pretenduar se vendimi për shembjen ishte i vështirë, por i drejtë.

“Unë nuk jam shenjtor dhe as i pagabueshëm, por nuk kam asgjë të bëj me punët e errëta për të cilat ju më akuzoni,” deklaroi Rama në Twitter duke iu drejtuar një prej protestuesve me emër.

Por minuta pas këtyre fjalëve, media regjistroi skenat e shpërndarjes së dhunshme një grupi protestuesish nga policia. Policia bëri të ditur të hënën se ka arrestuar shtatë protestues për mitingje të paligjshme dhe kundërshtim të forcave të rendit.

Një grup organizatash të të drejtave të njeriut lëshuan një deklaratë të fortë dënuese për ngjarjen, duke e konsideruar atë një humbje të pakthyeshme të identitetit kulturor dhe historik të vendit.

“Ne shprehim keqardhje për situatën në të cilën gjendet vendi sot,” shkruhet në deklaratën e firmosur nga pesëmbëdhjetë organizata që përfaqësojnë një spektër të gjerë të shoqërisë civile, nga aktivistët për mbrojtjen e të drejtave të romëve dhe egjiptianëve te organizatat për ndihmë ligjore falas dhe te organizatat për të drejtat e komunitetit LGBT apo organizata të lirisë së medias.

“Demokracia dhe parimet themelore të të drejtave të njeriut kurrë nuk kanë qenë më në rrezik se sot,” thuhet në deklaratë.

Godina e Teatrit Kombëtar u ndërtua nga arkitektë dhe inxhinierë Italianë në vitet 1940. Në të u përdor një material eksperimental i quajtur pupulit, i cili përbëhet nga një përzjerje zdrukthi me çimento. Ndërtesat u përdorën për teatro dhe kinema gjatë pushtimit, ndërsa në vitet 1950 u përdorën si skena gjyqesh false politike nga komunistët.

Historia e pasur e bënte ndërtesën një objekt të rëndësishëm të trashëgimisë kulturore, por kryeministri këmbëngul se ato ishin të pavlera dhe se ai do të ndërtojë një teatër të ri në vend të tij.