Policia e Lezhës gjobiti për shkelje të rregullave kundër COVID-19 kandidatin e Vetëvendosjes në Lezhë Iljaz Shehu, i cili e cilësoi gjobën vijim të presioneve pas arrestimit të disa aktivistëve. Drejtori i Policisë argumentoi se protesta ishte e paligjshme.
Kandidati i Pavarur i mbështetur nga Lëvizja Vetëvendosje në Qarkun e Lezhës, Iliaz Shehu, është gjobitur nga policia për shkelje të masave anti COVID-19.
Gjoba me vlerë 5 milion lekë të reja për Shehun është vendosur për tubimin e zhvilluar me 11 prill para Komisariatit të Policisë në Lezhë në mbështetje 4 aktivistëve të arrestuar, pas protestës së zhvilluar kundër ndërtimit të një HEC-i dhe fabrike ujit në Thirrë të Mirditës.
Gjoba e arsyetuar mbi urdhrin e Ministrisë së Shëndetësisë për ndalimin e grumbullimeve është e para e kësaj natyre në Lezhë edhe pse prej javësh partitë kryesore politike zhvillojnë tubime të ngjashme në shkelje të këtij urdhri.
Kandidati i Pavarur, Iliaz Shehu, e konsideroi gjobën, në një konferencë për shtyp, selektive dhe përpjekje për presion. “Policia e Shtetit u përdor si mjet i pushtetit, duke më gjobitur dhe mua me vlerë 5 milion lekë të reja dhe kjo tregon se mbështetja jonë për qytetaret është e ndëshkueshme jo nga ligji, por nga ata qe kanë kapur institucionet, duke përfshire dhe policinë”, tha Shehu. Ai tha se ky ishte një presion i hapur ndaj LVV-së dhe nuk kishte lidhje me masat. “Kjo nuk do na ndalë aspak” tha Shehu në një reagim publik pas gjobës.
I pyetur nga BIRN në lidhje me gjobën Drejtori i Policisë së Lezhës Zef Laska tha ndër të tjera se protesta nuk kishte pasur leje të policisë. I pyetur nëse ishin gjobitur për protestë pa leje apo për shkelje të rregullave të vendosura kundër grumbullimeve drejtori i Policisë së Lezhës Zef Laska pretendoi se ishin të dyja. “Kanë protestuar pa leje para komisariatit të policisë duke shkelur patjetër edhe rregullat anticovid”, tha drejtori i Policisë së Lezhës Zef Laska. Ai nuk dha referenca ligjore për pretendimin e tij.
Ndërkohë i pyetur për selektivitetin e gjobës Drejtori i Policisë së Lezhës pretendoi se mitingjet e Partisë Socialiste, asaj Demokratike dhe LSI në Lezhë, edhe pse ishin me më shumë se 10 persona dhe për rrjedhojë të ndaluara me urdhër të Ministrisë së Shëndetësisë, nuk gjobiteshin pasi bëheshin me njoftim.
Ai dha si argument edhe se këto mitingje nuk ishin bërë para komisariatit të policisë. “Tjetër para policisë, tjetër në një shesh publik”, tha Laska, pa arsyetuar se cila ishte diferenca në shpërndarjen e COVID-19 në dy rastet. Urdhri i Ministrisë së Shëndetësis, për ndalimin e grumbullimeve për shkak të COVID-19, nuk specifikon asnjë nga arsyet që dha Laska në lidhje me tolerimin e partive kryesore dhe gjobën ndaj kandidatit të pavarur.
Më herët gjatë këtij muaji në mënyrë po selektive dhe të pa arsyetuar Policia e Bulqizës gjobiti kandidatin e pavarur Elton Debreshi, ndërsa njëlloj nuk shpjegoi pse kandidatë të partive të mëdha nuk ishin gjobitur.
Aktivistët e Lëvizjes Vetëvendosje dhe kandidati i mbështetur prej tyre Iliaz Shehu, ishin pjesë e protestës së banoreve të fshatrave Thirrë dhe Sang në Mirditë, pas të cilës u arrestuan organizatori dhe 4 aktivistë. Gjykata vendosi që ata të hetohen në gjendje të lirë.
