Lajm19 May 2021

Policia sekuestron rreth 123 mijë paund në Portin e Durrësit, arrestohet transportuesi

Policia dhe dogana e Portit të Durrësit sekuestruan 123 mijë paund të padeklaruara,  të fshehura në parakolpin e një fugoni, i cili vinte nga Anglia. Shoferi, një 21 vjeçar nga Hamallaj i Durrësit, u arrestua.

Autor: Geri Emiri BIRN Durrës
Printo

Paratë e sekuestruara. Foto kortezi Policia e Durrësit.

Policia dhe dogana e Portit të Durrësit sekuestruan të mërkurën 123 mijë paund të padeklaruara,  të fshehura në një fugon i cili vinte nga Anglia, me drejtues një 21 vjeçar banues në fshatin Hamallaj, Durrës.

“Gjatë kontrollit, në pjesën e prapakolpit të fugonit janë gjetur dhe sekuestruar në cilësinë e provave materiale 12 pako me para”, njoftoi Policia e Durrësit.

Policia deklaroi se nga numërimi kishin rezultuar 123 mijë paund sterlina (GBP), të cilat u gjetën pasi fugoni u analizua imtësisht në vijën e dytë të kontrollit. Me fugonin ishin duke u sjellë disa mallra drejt Shqipërisë.

Drejtuesi i automjetit, 21 vjeçari me iniciale O. S. u arrestua në kushtet e flagrancës dhe akuzohet për veprat penale, “Pastrimi i produkteve të veprës penale ose veprimtarisë kriminale”,  “Mos deklarimi në kufi i të hollave dhe sendeve me vlerë” dhe “Kontrabanda me mallra të tjerë”.

Policia e Durrësit njoftoi se në bashkëpunim me prokurorinë e qytetit po vijon puna për identifikimin dhe kapjen e personave të implikuar në këtë veprimtari.

Transporti i parave “cash” të fshehura në automjete është identifikuar si një metodë për të sjellë në vend paratë që vijnë nga aktivitet e paligjshme, si trafiku i lëndëve narkotike, për të cilin krimi i organizuar shqiptar vitet e fundit është identifikuar si një faktor gjithnjë e më shumë në rritje në Britaninë e Madhe.

Në qershor 2018 në Portin e Durrësit u kap sasia më e madhe parave të padeklaruara, 3.4 milion euro të fshehur në një automjet të markës “Toyota”, modeli “Auris”, por hetimi u shfry kur prokuroria pranoi të mirëqenë alibinë e një shtetasi gjerman që deklaroi se ishte zotëruesi i parave dhe se po i sillte  me ambicien për të blerë toka në bregdetin shqiptar.