Bankat e nivelit të dytë treguan interes të lartë për blerjen e borxhit publik në euro të emetuar në ankand urgjent të Hënën, por interesi i kërkuar ishte shumë më i lartë se sa në ankandet e ngjashme të viteve të fundit.
Qeveria shqiptare siguroi 100 milionë euro borxh përmes emetimit të obligacioneve dyvjeçare në tregun e brendshëm të hënën, me një normë interesi vjetore prej 1.96%. Rezultati i ankandit i publikuar nga Banka e Shqipërisë tregon se interesi për këtë investim ishte i lartë nga bankat dhe institucionet e tjera financiare por njëkohësisht, norma e interesit të kërkuar ishte mëse dy herë më e lartë se sa në ankande të ngjashme.
Të dhënat e Ministrisë së Financave tregojnë se që nga viti 2016, qeveria shqiptare ka qenë në gjendje të marrë hua në tregun e brendshëm në euro përkundrejt një interesi prej vetëm 0.8%, dukshëm më e ulët se sa interesi 1.96% i këtij ankandi.
Qeveria shqiptare ka emetuar obligacione në Euro që nga viti 2011 por duke filluar nga viti 2016, si pasojë e ndryshimeve rregullatorë që ndaluan bankat të kreditonin në euro për klientët që kanë të ardhura në lekë, interesat e këtyre titujve ishin në nivele shumë të ulëta.
Bankat janë në përgjithësi fitueset kryesore të obligacioneve në euro të emetuara në tregun e brendshëm. Interesat e depozitave në euro aktualisht janë pak më shumë se 0.1% ndësa këto depozita bankat kanë mundësi t’i investojnë te borxhi publik me interes 1.96% duke arkëtuar diferencën.
Përvecc obligacioneve në euro në tregun e brendshëm, Shqipëria ka emetuar edhe obligacione në euro në tregun ndërkombëtar. I fundit i këtij lloji është emetuar në vitin 2018 ku për obligacione shtatëvjeccare interesi ishte 3.55%.
