Lajm17 Oct 2018

Tre kallëzime “konstante” mbajnë në burg Rexhep Rrajën

Djali i deputetit socialist u la në masën e sigurisë arrest me burg nga Gjykata e Apelit në Tiranë pavarësisht këmbënguljes së ish-të dashurës së tij se ka kryer kallëzim të rremë para oficerëve të policisë.

Autor: Edmond Hoxhaj BIRN Tiranë
Printo

Rexhep Rraja i fotografuar më 2 tetor 2018 në Krujë. Foto: LSA

Vajza 25 vjeçare me inicialet Xh.M., e cila akuzoi për dhunë ish-të dashurin e vet Rexhep Rraja disa javë më parë, u shfaq në derën e Gjykatës së Apelit në Tiranë të mërkurën më 17 tetor për të përsëritur atë që kishte deklaruar në mënyrë të përsëritur gjatë ditëve të fundit, se kallëzimet e saj ndaj Rrajës ishin të shkaktuara nga xhelozia e saj dhe jo nga dhuna.

Por Gjykata e Apelit u bind nga kërkesa e prokurorisë për masën e sigurisë “arrest me burg” duke u mbështetur në faktin se para se të shpallte publikisht tërheqjen nga akuzat, Xh.M. ka folur para tre oficerëve të policisë gjyqësore për të dhënë tre kallëzime për dhunë, ndërsa është ankuar pranë shërbimit të kontrollit të brendshëm të policisë për një oficer tjetër që nuk ia pranoi kallëzimin.

Prokuroria dhe trupi gjykues iu referuan tre kallëzimeve të Xh.M si “konstante” duke nënkuptuar këmbënguljen e vajzës në raportimin e dhunës së ndodhur.

Rexhep Rraja, i biri i deputetit socialist Rrahman Rraja, u arrestua nga policia më 30 shtator, nën akuzën e përndjekjes, një vepër penale që dënohet me burgim nga gjashtë muaj deri në katër vjet në rast se kryhet ndaj një personi pa lidhje shpirtërore dhe që rritet me një të tretën në rast se kryhet nga një personi të lidhur, fjala vjen, ish-të dashurës.

Para arrestimit të Rrajës, skena politike në vend u trazua nga deklaratat nga arratia të ish-oficerit të policisë Emiljano Nuhu, i cili tha se ishte detyruar të ikte nga Shqipëria pas kërcënimeve të figurave me pushtet në Partinë Socialistë që i kërkuan të mos kryente detyrën e tij ndaj të akuzuarit Rraja. Nuhu akuzoi babain deputet të të pandehurit si dhe deputetin Taulant Balla mes të tjerëve, për kërcënime të kryera brenda rajonit të policisë. Balla dhe deputeti Rraja mohojnë akuzat.

Rraja nuk ishte i pranishëm në seancën gjyqësore të së mërkurës, por avokati i tij Ilir Murati kërkoi lirimin duke argumentuar se nuk ka prova kundër tij, se kallëzuesja e ka bërë kallëzimin nga xhelozia, se plagët e identifikuara në trupin e saj nga mjekësia ligjore nuk vërtetohen dot si të shkaktuara nga Rraja. Murati kërkoi liri ose masë më të lehtë sigurie se sa arresti me burg për klientin e tij edhe për arsye familjare. Sipas tij, nëna e të akuzuarit vuan aktualisht nga një sëmundje e rëndë ndërsa i ati ka pësuar aksident.

Murati aludoi gjithashtu se gjykata ishte nën presion publik dhe politik për shkak të sensitivitetit të procesit gjyqësor.

“Kjo është një histori rozë, për xhelozi, pasi Rexhep Rraja shkoi në Jalë me një tjetër vajzë. Ndërkohë, dëmtimet nuk janë konstatuar se kur janë bërë, ka vajza që i bëjnë edhe vetë”, tha Murati para trupës gjykuese. “Kjo ndodh se jeni të gjithë nën presion”, shtoi ai.

Kryetarja e trupës gjykuese Shpresa Beçaj e hodhi poshtë pretendimin. “Ky trup gjykues do të bazohet vetëm në prova pavarësisht si e ka bërë punën e saj media”, tha ajo.

Prokurori Arben Qosja kundërshtoi pretendimet e palës mbrojtëse duke i cilësuar ato jashtë objektit të gjykimit dhe të pambështetura në prova. Ai e vlerësoi si të drejtë vendimin e Gjykatës së Rrethit Gjyqësor Krujë dhe pohoi se veç deklarimeve konstante së të dëmtuarës, ka rezultuar se ajo ka pasur shenjat e djegies me cigare në pjesë të ndryshme të trupit.

Gjyqtarja Beçaj e argumentoi vendimin për masën e sigurisë arrest me burg me faktin se Xh.M. ka dhënë “deklarata konstante” para tre oficerëve, Dritan Koldashi, Erion Dunga dhe Emiljano Nuhu, ndërsa është ankuar për një të katërt, Gentian Çitozi, i cili dyshohet se ka refuzuar të marrë kallëzimin. Policia ka konfirmuar ndërkohë se Çitozi është pezulluar nga detyra për këtë shkak.

Policia dhe prokuroria janë përballur me pikëpyetjet se pse Rraja u la i lirë për më shumë se pesë javë nga 23 korriku deri më 30 shtator. BIRN raportoi më herët se të dhënat gjyqësore sugjeronin se policia ndërmori veprime hetimore vetëm në ditët e fundit të shtatorit, pasi kishte marrë denoncimin publik të oficerit Nuhu më 26 shtator.

Vendimi i apelit detyron Rrajën të presë në paraburgim fillimin e gjykimit ndaj tij.