Dy minatorë humbën jetën të martën në një minierë kromi në zonën e Martaneshit pasi tuneli ku po punonin u shemb
Donald Barçi, 30 vjeç dhe Xhemal Sela, 53, qenë pjesë e një grupi me shtatë minatorë që po punonin në Galerinë 7 në minierën e Fushë Lopës.
Sipas Repartit të Inspektimit dhe SHpëtimit të Minierave (RISHM), shkaku i aksidentit qe mosrespektimi i rregullores teknike. Ministria e Ekonomisë dhe Industrisë njoftoi të mërkurën se i ka revokuar lejen e punës subjektit Alba CO që kishte të drejtën e shfrytëzimit të këtij burimi minerar.
“Pas zbrazjes së grykës së traversës nga materiali, minator/zjarrmëtari Xhemal Sela dhe ndihmësi Donald Baci, kanë hyrë dhe janë ekspozuar në brendësi të hapësirës së shfrytëzuar, me qëllim për të vrojtuar për rrëzimin e mineralit. Në këto momente, nga tavani i hapësirës janë shkëputur dy blloqe masivi shkëmbor ultrabazik me përmasa të mëdha, duke i goditur dhe shkaktuar vdekje të menjëhershme të dy punëtorëve”, njoftoi ministria.
Policia njoftoi se arrestoi inxhinierin e minierës, Shemsi Ballabani në lidhje me aksidentin.
Nxjerrja e kromit dhe bakrit është rritur me shpejtësi në Shqipëri përgjatë viteve të fundit dhe eksportet janë rritur krahas shtimit të aksidenteve vdekjeprurëse, një pjesë e të cilave shkaktohen nga kushtet e këqija të punës dhe investimet e papërshtatshme nëpër miniera.
Shqipëria ka disa nga depozitat më të pasura të Europës me krom, një mineral që përdoret për të prodhuar aliazhe alumini dhe çelik. Të gjitha minierat janë private dhe puna bazohet në marrëveshje koncesionare me qeverinë.
Ministria e Ekonomisë thotë se ka anuluar gjatë këtij viti 160 marrëveshje në sektorin minerar. Gjithsesi masat drastike nuk kanë ndaluar aksidentet e rënda.
Dy javë më parë, dy punëtorë shqiptarë dhe një inxhinier turk vdiqën ndërsa po punonin për të hapur një tunel për një hidrocentral të ri në fshatin e Qafë Mollës në rajonin e Mirditës.
