Gazeta tablloid proqeveritare ‘Informer’ publikoi një seri akuzash kundër Rrjetit Ballkanik të Gazetarisë Investigative, pas publikimit të investigimit mbi një kontratë sekrete qeveritare me kompaninë e Emirateve Etihad Airways.
Informer shkroi të mërkurën se gazetarë nga Rrjeti Ballkanik i Gazetarisë Investigative, BIRN, dhe Qendra e Serbisë për Gazetari Investigative, CINS, janë përpjekur të përgjojnë kryeministrin e Serbisë Aleksandar Vucic, duke e detyruar atë të anulojë pushimet e tija verore. Ky qe lajmi i dytë kritik ndaj BIRN pasi Rrjeti publikoi një investigim të thelluar mbi një kontratë të rëndësishme në transportin ajror.
Duke cituar burime qeveritare pa emër, gazeta tablloid pretendoi se Vucic anuloi pushimet e tij në liqenin Bor të Serbisë dy javë më parë pasi mësoi se “disa të dyshuar” nga BIRN dhe CINS po qëndronin në të njëjtin hotel. “Vucic anulon pushimet për shkak të ‘spiunëve’ bë hotel”, shkruan titulli i lajmit.
Akuzat pasojnë publikimin e investigimit të BIRN mbi pyetjen nëse Serbia pagoi shtrenjtë për një kontratë me kompaninë ajrore Etihad të Emirateve të Bashkuara Arabe.
Investigimi, publikuar nga BIRN në revistën e përjavshme Vreme, zbuloi se për 51 për qind të aksioneve në kompaninë e sapothemeluar, Air Serbia, Serbia pagoi disa herë më shumë se sa partneri i vet nga Emiratet.
Drejtori i BIRN Serbi, Dragana Obradovic, tha se akuzat e tablloidit qenë një fushatë për të diskretituar punën e BIRN DHE CINS.
“Askush nuk qe në Bor për të spiunuar mbi kryeministrin, një pretendim qesharak ky, për shkak se BIRN dhe CINS janë shumë larg gazetarisë së paparacëve,” tha Obradovic.
Të shtunën e kaluar, Informer akuzoi gjithashtu se Bashkimi Europian po financonte në mënyrë sekrete BIRN dhe CINS, të cilat po merrnin kontrata nga Komisioni Europian me vlerë prej miliona eurosh.
Obradovic shpjegoi se BIRN dhe CINS kanë fituar një projekt përmes një thirrjeje publike dhe tha se BIRN nuk ka fshehur kontratat, por i ka sugjeruar gazetës Informer të flasë me Misionin e BE-së në Serbi, i cili ka të drejtë të zbulojë detajet.
Informer këmbënguli gjithashtu se BIRN ka refuzuar të përgjigjet për pyetjen nëse kontrata nga BE përmbante kufizime mbi atë çfarë BIRN mund të investigojë apo jo, duke sugjeruar se BE ka ndaluar investigimet që përfshijnë kompani nga BE-ja.
Por Obradovic tha se edhe kjo është e pavërtetë.
“Ne në mënyrë eksplicite kemi thënë se BE nuk përcakton temat mbi të cilat ne investigojmë dhe as nuk ndalon ndonjë temë të caktuar siç pretendon gazetari i Informer,” tha ajo.
Në ditën pas publikimit të gjetjeve të BIRN, javën e kaluar, Vucic mbajti një konferencë për shtyp ku këmbënguli se raporti bazohej në versione të pasakta të kontratës me Etihad. “Ata duhet të kenë marrë ndonjë draft të mëhershëm,” tha ai.
Ai sugjeroi gjithashtu se investigimi po i shërbente interesave të oligarkut serb Miroslav Miskovic, i cili është aktualisht nën akuzë për korrupsion.
Vucic tha se Vreme qe nën pronësinë e Miskovic, i cili është bërë simbol i fushatës antikorrupsion të kryeministrit.
Shoqata e Gazetarëve të Pavarur të Serbisë, NUNS, këmbënguli se zbulimet e BIRN dhe CINS mbi marrëveshjen për kompaninë ajrore qenë në interes publik.
“Në një shoqëri demokratike është e papranueshme që kryeministri të diskretitojë median në një mënyrë të tillë në publik,” deklaroi NUNS të premten e shkuar.
Në konferencën për shtyp të Vucic javën e kaluar ai bëri gjithashtu publike zyrtarisht detajet e marrëveshjes me Etihad për herë të parë.
NUNS u përgjigj duke thëns se qe “e qartë se artikulli i publikuar te Vreme detyroi qeverinë dhe kryeministrin të bëjnë më në fund publike kontratën me Etihad”.
Vreme ndërkohë akuzoi Vucic se “po përpiqej të parandalonte punën e lirë, objektive dhe të pavarur të gazetarëve” duke krahasuar kritikat e tij ndaj BIRN dhe CINS me veprimet e tij si ministër informacioni në vitet 1990 në qeverinë e Sllobodan Millosheviçit.