Kryeministri i Federatës së Bosnjës hodhi poshtë thirrjet për pensione më të larta duke nxjerrë si problem koston e lartë ekonomike të përmbytjeve të majit
Entiteti i Federatës së Bosnjës hodhi poshtë thirrjet për rritje pensionesh, duke thënë se dëmet e shkaktuara nga përmbytjet e majit e bënin të pamundur përballimin e kostos financiare.
Shoqata e Pensionistëve në entitetin Federativ po kërkon që qeveria të rrisë pensionet me 5 për qind, duke argumentuar me situatën e vështirë ekonomike.
Kryeministri i entitetit Nermin Niksic më 19 gusht hodhi poshtë këtë kërkesë si të pamundur.
“Kjo nuk është realiste këtë moment, duke patur parasysh katastrofën natyrore që ndodhi, e cila ka prekur aktivitetet ekonomike,” tha ai, duke iu referuar përmbytjeve shkatërrimtare që goditën Bosnjën në maj.
“Ulja e aktivitetit ekonomik nënkupton të ardhura më të ulëta, të cilat në fund prekin edhe fondet [e pensioneve],” shtoi ai.
“Unë i respektoj kërkesat e pensionistëve dhe situatën e tyre,” vijoi ai, duke argumentuar, gjithsesi, se është sakaq e vështirë që të përballohen shpenzimet për nivelin aktual të pensioneve.
Shoqata e pensionistëve tha se vuajtjet e tyre kërkonin vëmendje. “Jeta jonë është shumë më e vështirë nga sa qe pesë vjet më parë,” tha presidenti i Asamblesë së Shoqatës së Pensionistëve në Federatë, Omer Omerefendic.
Ai shtoi se më shumë se gjysma e pensionistëve në këtë entitet jetojnë “poshtë nivelit minimal për dinjitet njerëzor”.
Një problem madhor në lidhje me pagesën e pensioneve në Bosnjë është numri i pensionistëve në raport me numrin e të punësuarve.
Në Republikën Srpska, entiteti tjetër i Bosnjës, numri i pensionistëve është aktualisht më i lartë se sa numri i njerëzve të punësuar.
Në korrik të këtij viti, pati rreth 247 mijë pensionistë dhe rreth 237,500 të punësuar në entitetin e banuar në maxhorancë nga serbët.
Në entitetin e Federatës në maj, pati 385 mijë pensionistë dhe rreth 443 mijë të punësuar.
“Pas dhjetë vjetësh premtimesh boshe për përmirësimin e statusit tonë në Republikën Srpska, ne na kanë çuar drejt mizerjes dhe varfërisë,” tha Ilija Stevancevic, nga partia e pensionistëve në Republikën Srpska.
Statistikat për majin e këtij viti thonë se pensioni mesatar në Federatë qe 188 euro ndërsa paga mesatare qe 427 euro. Në republikën Srpska, pensioni mesatar në maj qe 169 euro ndërsa paga mesatare qe 418 euro.