Misioni i BE-së për sundimin e ligjit kërkon të arrestojë një kryekomunar serb dhe një ish-kryekomunar – një lëvizje që mund të acarojë situatën në veri të Kosovës.
Misioni i sundimit të ligjit të BE-së në Kosovë, EULEX, lëshoi urdhërarrestet të hënën pasi Stevan Vulovic, kryebashkiaku i komunës së Zubin Potokut dhe Slavisa Ristic, një ish-kryetar i të njëjtës komunë nuk pranuan të shkojnë për t’u marrë në pyetje nga prokurorët.
“Ne mund t’ju informojmë se thirrjet i qenë dërguar për marrje në pyetje nga prokurori për të dy individët dhe për shkak se ata nuk u paraqitën, prokurori ka kërkuar një gjykatësi të lëshojë urdhërarreste në mënyrë që ata të merren në pyetje,” deklaroi zëdhënësi i EULEX Miguel Carvalho de Faria për BIRN.
Vulovic akuzohet se ka organizuar një arratisje të burgosurish dhe Ristic akuzohet se ka vënë në rrezik personelin e OKB-së apo ndihmësit e tyre si dhe për vrasje në rrethana rënduese, i tha një zyrtar i EULEX stacionit radiofonik të serbëve të Kosovës Kontakt Plus.
Zëdhënësi i EULEX tha gjithsesi se “është e rëndësishme që të vërehet se këto urdhra arresti janë praktikë normale kur një i dyshuar ftohet për një intervistë dhe nuk paraqitet”.
Lëvizja mund të përkeqësojë tensionet sakaq të larta mes udhëheqësve serbë të Kosovës dhe misionit të BE-së.
Vulovic tha në prill se EULEX qe një kërcënim afatgjatë për sigurinë e Kosovës së veriut që dominohet nga serbët. Misioni i BE-së i bëri thirrje atij të kërkojë ndjesë për këtë koment duke shtuar se Kosova qe nën “sundimin e krimit të organizuar”.
Fillimi i gjykimit për krime lufte së fundmi ndaj Oliver Ivanovic, një ish zyrtar i qeverisë së Serbisë dhe kreu i partisë politike të serbëve të Kosovës Liri, Demokraci, Drejtësi, ka shkaktuar gjithashtu reagime të ashpra.
Grafite ku shkruhet “EULEX ik” dhe “EULEX është armiku i popullit serb” u shfaqën nëpër muret e pjesës veriore serbe të qytetit të ndarë të Mitrovicës kur u hap gjyqi muajin e kaluar.
Ivanovic u deklarua i pafajshëm për kryerjen e krimeve të luftës gjatë konfliktit të Kosovës dhe për nxitjen e vrasjes së shqiptarëve gjatë përleshjeve që shpërthyen më vonë.
Në shtator vitin e kaluar, një karvan i EULEX u sulmua në veriun e Kosovës dhe një oficer policie u vra.
EULEX tha në një deklaratë të premten se gjithsesi misioni do të vijojë me mandatin e vet në të gjithë Kosovën “në përputhje me dëshirat e vendeve anëtare të Bashkimit Europian”.
